ސީދާ ރައްޔިތުންނާ ގުޅުންހުރި ޓެކްސް ކަމުގައިވާ ޖީއެސްޓީ ބޮޑުކުރީ މިދިޔަ އެމްޑީޕީ ސަރުކާރުގައި ކަމަށް ރައްޔިތުންގެ މަޖިލީހުގެ ފުނަދޫ ދާއިރާގެ މެމްބަރު މުހައްމަދު މަމްދޫހު ވިދާޅުވެއްޖެއެވެ.
ސަރުކާރުގެ ފަރާތުން ކޮލަމާފުށި ދާއިރާގެ މެންބަރު އިބްރާހީމް ދީދީ ހުށަހަޅުއްވާފައިވާ، މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް ހުށަހަޅާފައިވާ ބަދަލުތަކާ ގުޅޭ ބިލަށް ބަހުސްކުރައްވަމުން މަމްދޫހު ވިދާޅުވީ، އެމްޑީޕީގެ ސަރުކާރުން ރައްޔިތުންނާ ގުޅުންހުރި ޓެކްސްތައް ބޮޑުކުރީ، މާލީ އިދާރާތަކުން ލޯނު ނެގުމަށް ރާއްޖެއަށް އޮތް ހުރިހާ ދޮރެއް ބަންދުވުމުން ކަމަށެވެ.
އިދިކޮޅު އެމްޑީޕީން އާންމު ރައްޔިތުންނަށް އޮޅުވާލުމުގެ ނިޔަތުގައި ދައްކާ އެންމެ ބޮޑު ވާހަކައަކީ، މި ސަރުކާރުން ރައްޔިތުންނަށް ދަތިވާގޮތަށް ސިޔާސަތުތައް ބައްޓަންކުރާ ވާހަކަކަން ފާހަގަކުރައްވައި މަމްދޫހު ވިދާޅުވީ، އެއީ ހަގީގަތާ ހިލާފު ވާހަކަތަކެއް ކަމަށެވެ. އަދި ކުރީގެ އެމްޑީޕީ ސަރުކާރުން ޖީއެސްޓީ ބޮޑުކުރީ، ދައުލަތުގެ ރިކަރަންޓް ހަރަދުތައް ހަމަޖައްސާނެ އެއްވެސް ގޮތެއް ނެތިގެން ކަމަށް މަމްދޫހު ވިދާޅުވިއެވެ.
މަމްދޫހު އިތުރަށް ވިދާޅުވީ، ސަރުކާރުގެ ދައުރު މި ހިސާބަށް އައިރުވެސް ދައުލަތުގެ އާމްދަނީ އިތުރުކުރުމަށްޓަކައި އާންމު ރައްޔިތުންނާ ގުޅުންހުރި އެއްވެސް ޓެކްސްއެއް ބޮޑުކޮށްފައި ނުވާކަމަށެވެ.
މީގެ އިތުރުން، މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް މިހާރު ގެނެވޭ ބަދަލާއެކު ވިޔަފާރިވެރިންނަށް ބޮޑެތި ލުއިތަކެއް ލިބިގެންދާނެކަމަށް ވެސް މަމްދޫހު ވަނީ ވިދާޅުވެފައެވެ.