ހަގީގަތުގައި މެންބަރުންނަކީ ވަރަށް ނިކަމެތި ބައެއް ކަމަށް ހުޅުދޫ ދާއިރާގެ މެންބަރު މުހައްމަދު ޝާހިދު ވިދާޅުވެއްޖެއެވެ.

މަޖިލީހުގެ މެންބަރުންނަށް ލިބިވަޑައިގަންނަވާ ހެލްތު އިންޝުއަރެންސް ކަނޑާލަން ގޮވާލައި 7،225 މީހުންގެ ސޮޔާ އެކު މަޖިލީހަށް ހުށަހަޅާފައިވާ ޕެޓިޝަނަށް މިއަދުގެ ޖަލްސާގައި ކުރި ބަހުސްގައި ޝާހިދު ވިދާޅުވީ، ބަހުސް ކުރެވެމުން ދާ ޕެޓިޝަން ނުވަތަ ދެކެވެމުންދާ ވާހަކަތަކަކީ އަނެއްކާވެސް މަޖިލިސް މެންބަރުންނާއި ރައްޔިތުން ޖައްސާލުމުގެ ބޭނުމުގައި ބަޔަކު ކޮށްގެން އުޅޭ ކަމެއް ކަމަށެވެ.

މެންބަރު ވިދާޅުވީ، ރައްޔިތުންގެ މަޖިލީސް މިގޮތުގައި ރައްޔިތުންނަށް ހެވާ ލާބަޔާ މަންފާ ހޯދައި ދިނުމަށް ރައްޔިތުން އައްޔަނު ކުރާ މެންބަރުންގެ ގޮތުގައި ހިނގަމުންދާތާ އެތައް ދުވަހެއް ވެއްޖެކަމަށެވެ.

މަޖިލީހުގެ މެންބަރުންނަށް އިންޝުއަރެންސް އަދި އިނާޔަތްތައް އޮތީކީ މިއަދު އެކަނި ނޫންކަން ފާހަގަކުރައްވާ މެންބަރު ވިދާޅުވީ، އާންމު ގޮތެއްގައި ރާއްޖޭގައި ރައްޔިތުންގެ މަޖިލީހުގެ މެންބަރެކޭ ބުނުމުން ގިނަ ބަޔަކު ހީ ކުރަނީ އެއީ ވަރަށް ގިނަ ކަންކަން އެބަޔަކަށް ކުރެވޭ ވަރަށް ބޮޑެތި އިނާޔަތްތަކާއި ހިމާޔަތެއް ލިބޭ ބައެއް ކަމަށެވެ.

އެއްވެސް ކަހަލަ ރައްކާތެރިކަމެއް. އިނާޔަތެއްވެސް ނެތް. ހުސްނަން ވަނީ. މެންބަރެކޭ ބުނީމަ މެންބަރުގެ އެއްކަލަ ރައްޔިތުން މަޖިލީހުގެ މެންބަރޭ. އެހެން ބުނީމަ މީގެ ކުރީގައި ފަހަރެއްގައި ވެދާނެ މެންބަރުކަން ކޮށްފައި ތިއްބެވީ ވަރަށް ތަނަވަސް ވަރަށް ފުދުންތެރި ބޭފުޅުން ކަމަށް ވާތީވެ. މިހާރު މިހިނގާ މަޖިލީސް ތަކުގައި ހަގީގަތުގައި ރައްޔިތުން މިވަނީ އެކަންކަން ވަރަށް ބޮޑަށް ބަދަލުކޮށްފަ.

ހުޅަދޫ ދާއިރާގެ މެންބަރު މުހައްމަދު ޝާހިދު

މިހާރު ރައްޔިތުން މަޖިލީހުގެ މެންބަރުކަމަށް އަންނަނީކީ ކޮންމެހެން މުއްސަނދި މަހުޖަނެއް ނުވަތަ ގާނޫނީ ގޮތުން މާބޮޑު ލޯޔަރަކަށް ވެގެން ނޫންކަމަށް މެމްބަރު ވިދާޅުވިއެވެ. ރައްޔިތުންގެ ހައްގުގައި މަސައްކަތްކުރާ އެދާއިރާއެއްގައި ރައްޔިތުންނާއި ގުޅުން އޮންނަ އަދި އެއޮންނަ ސަރުކާރަކާ ގުޅިގެން ގައުމަށާއި ރައްޔިތުންނަށާއި އެ ދާއިރާއަކަށް ކުރިއެރުން ހޯދައި ދިނުމަށް ކަމަށް މެމްބަރު ވިދާޅުވިއެވެ.

އެހެންކަމުން ރައްޔިތުން މަޖިލީހުގެ މެންބަރެއްގެ މުސާރަ މިސާލަކަށް ބުނެދާނެ 82،000 ރުފިޔާއޭ ނޫން 42،000 ރުފިޔާ މުސާރައަކީ. 42،000 މުސާރަޔަކީ ލިވިން އެލެވެންސެއް ނުވަތަ ކޮމިޓީ އެލެވެންސެއްގެ ގޮތުގައި އެއްޗެއް ލިބޭ ކަމަށް ވަންޏާ އެ ލިބޭ އެއްޗެއް ލައިގެން ތި ވިދާޅުވާ އެއްޗެއް އެ ވަނީ. ގިނަ ފަހަރު ގިނަ މީހުންނަށް ނުލިބޭ 42،000 މިހާރު ހަދާފައިންގޮތުން. މި އިސްކޫލަކާއި އެއްވަރު ވެއްޖެ މި މަޖިލީސް މިހާރު. ގަޑި އެބަޖެހޭ މުސާރަ ކެނޑޭ ފިޔަވަޅު އެބަ އެޅޭ މި ވާހަކަ ދައްކަން ނުކެރޭ. މިއަދު ކޮބައިތޯ އިދި ކޮޅު މެންބަރުން. އެމީހުން މިއަދު އެބަ ދައްކާ އެމީހުންވެސް މީގެ ކުރިން އެބަ ތިއްބޭ.

ހުޅަދޫ ދާއިރާގެ މެންބަރު މުހައްމަދު ޝާހިދު

ރައްޔިތުންގެ މަޖިލީހުން މިއަހަރަށް ފާސްކުރި 64.2 ބިލިއަން ރުފިޔާގެ ތެރެއިން އާސަންދައަށް ހާއްސަކޮށްފައި އޮތީ 2.02 ބިލިއަން ރުފިޔާ އެވެ. މިމަހުގެ އަށް ވަނަ ދުވަހު ފިނޭންސް މިނިސްޓްރީން އާއްމުކޮށްފައިވާ ހިސާބުތަކުން ދައްކާ ގޮތުގައި އާސަންދައިގެ ބަޖެޓުން އެހާތަަނަށް ހަރަދުވެފައި ވަނީ 1.9 ބިލިއަން ރުފިޔާ އެވެެ.