ކުށްކޮށްގެން ހޯދާ މުދަލާގުޅޭ ބިލުގެ ނަމުގައި ކުރީ ސަރުކާރުން ގެނައީ ދެ ފޮޅުވަތް ކަމަށާއި، އޭގެ ދަށުން ހަމައެކަނި ދައުލަތުގެ ވަޒީފާގެ މީހެއްގެ މުދާ ނެގެނީ އާންމު ފަރުދުންގެ ތެރޭގައި ހިނގާ މުއާމަލާތްތަކާއި އެއްވެސް ވަރަކަށް ހިސާބު ޖަހާލެވޭ ގޮތަކަށް ނޫން ކަމަށް، ރައްޔިތުން މަޖިލީހުގެ މަހިބަދޫ ދާއިރާގެ މެންބަރު އަހްމަދު ތާރިގް ވިދާޅުވެއްޖެއެވެ.
ސަރުކާރުގެ ފަރާތުން ފުވައްމުލަކު މެދު ދާއިރާގެ މެމްބަރު އަލީ ފަޒާދު ހުށަހަޅުއްވާފައިވާ ކުށްކޮށްގެން ހޯދާ މުދަލާ ބެހޭ ބިލުގެ އިބްތިދާއީ ބަހުސްގައި ވާހަކަ ދައްކަވަމުން މެންބަރު ތޯރިގް ވިދާޅުވީ، އެމްޑީޕީގެ ފަރާތުން މައިނޯރިޓީ ލީޑަރު ނޫމަޑީގެ ވާހަކަ ދެއްކެވިއިރު، ނޫމަޑި ފައިބައިގެން ދިޔައީ އެމްޑީޕީގެ ފުރަތަމަ ވެރިކަމުގައި ކަމަށެވެ. އަދި ނޫމަޑިއަކީ ހއ. އަތޮޅުގެ ބައެއް ރަށްރަށުގައި ރޯ ހައުސްތަކެއް އެޅުމަށްޓަކައި އުފެއްދި ކުންފުންޏެއް ކަމަށް ތޯރިގް ވިދާޅުވިއެވެ.
އެ މައްސަލާގައި ކުރީގެ ރައީސް ޔާމީންގެ ވެރިކަމުގެ ތެރޭގައި އެ ޕްރޮޖެކްޓް ނުހިންގާ ފަޅުތަކެއް ދީފައި އެފަޅުތައް ވިއްކާލަން އުޅެން ފެށުމުން އޭގެން ބައެއް ފަޅުތައް ނޫމަޑީގެ އަތުން ނެގީ ކަމަށް ތޯރިގް ވިދާޅުވިއެވެ. އަދި އެ މައްސަލަ ސިންގަޕޫރުގެ އާބިޓްރޭޝަންއަށް ދިޔަކަން ފާހަގަކުރައްވައި މެންބަރު ވިދާޅުވީ، އާބިޓްރޭޝަންއިން މައްސަލައިގެ ހުކުމް ކުރުމުގެ ކުރިން އޭރުގެ އެމްޑީޕީ ވެރިކަމުގެ ތެރޭގައި ދިވެހި ދައުލަތުން ބޮޑު އަދަދެއް ދޭންޖެހުނު ކަމަށެވެ. އެހެންކަމުން ނޫމަޑިއަކީ އެމްޑީޕީއާއެކު އެއްކޮށް އޮޅުންބޮޅުންވެފައިވާ މައްސަލައެއް ކަމަށާއި، އެއީ އެމްޑީޕީއަށް ސަލާމަތްވެވޭނެ މައްސަލައެއް ނޫން ކަމަށް ތޯރިގް ވިދާޅުވިއެވެ.
ކުށްކޮށްގެން ހޯދާ މުދަލާ ބެހޭ ބިލުގެ އިބްތިދާއީ ބަހުސްގައި ވާހަކަ ދައްކަވަމުން ހެންވޭރު އުތުރު ދާއިރާގެ މެންބަރު އަހްމަދު އައިފާން ވިދާޅުވީ، ދުނިޔޭގައި އެންމެ ތަރައްޤީވެފައިވާ ޤައުމުތަކުގައި ވެސް މި ޤާނޫނަކީ ފާސްކޮށް ތަންފީޒު ކުރަމުންދާ ޤާނޫނެއް ކަމަށެވެ. އަދި މިފަދަ ޤާނޫނުތައް ގެންނަނީ އެކިއެކި ކުށްތައް ކޮށްގެން ޤާނޫނާ ހިލާފަށް މުއްސަދިކަން ހޯދާ ފަރާތްތައް ހުއްޓުވާ، މުޖުތަމައުގައި ދިމާވާ އެކިއެކި މައްސަލަތައް ހުއްޓުވުމުގެ ބޭނުމުގައި ކަމަށް އައިފާން ވިދާޅުވިއެވެ.
މީގެއިތުރިން އެ ބިލުގައި އޮތީ އެމްޑީޕީ މީހުން ހިފާ ހައްޔަރު ކުރާ ވާހަކައެއް ނޫން ކަމަށާއި، މި ސަރުކާރާއި ދެކޮޅު ހަދާ މީހުންގެ މުދާ ނަގާ ވާހަކައެއް ވެސް އެ ބިލަކު ނެތްކަމަށް އައިފާން ވިދާޅުވިއެވެ. އޭގެ ބަދަލުގައި، އެ ބިލުގައި އޮތީ ޤާނޫނާ ހިލާފަށް ކުށްކޮށްގެން ހޯދާ މުދާ ނުވަތަ ނުހައްގުން މުއްސަދިކަން ހޯދާ މުދާ އަނބުރާ ދައުލަތަށް ނަގާ ވާހަކަ ކަމަށް އައިފާން ވަނީ ވިދާޅުވެފައެވެ.