ޤައުމެއް ޤައުމެއްގެ ގޮތުގައި ކުރިއެރުވުމަށް މަސައްކަތް ކުރަންވީ އެޤައުމަކަށް ލާބަޔާ މަންފާވާނެ ގޮތަށް ކަމަށް ފުވައްމުލަކު ދެކުނު ދާއިރާ މެންބަރު އިބްރާހިމް ހުސައިން ވިދާޅުވެއްޖެއެވެ.
ސަރުކާރުގެ ފަރާތުން ފުވައްމުލަކު މެދު ދާއިރާގެ މެމްބަރު އަލީ ފަޒާދު ހުށަހަޅުއްވާފައިވާ ކުށްކޮށްގެން ހޯދާ މުދަލާ ބެހޭ ބިލުގެ އިބްތިދާއީ ބަހުސްގައި ވާހަކަ ދައްކަވަމުން މެންބަރު އިބްރާހިމް ހުސައިން ވިދާޅުވީ، ޤައުމު ކުރިއަރައިގެން ނޫނީ ރައްޔިތުންނަށް ރަނގަޅު ގޮތްތަކެއް ހޯދައި ނުދެވޭނެ ކަމަށެވެ.
މެންބަރު ވިދާޅުވީ، ކުށް ކޮށްގެން ހޯދާ މުއްސަނދިކަން ނިމުމަކަށް ގެންނަންޖެހޭ ކަމަށާއި ޤައުމެއް ގައުމެއް ގޮތުގައި ކުރިއަރައިގެން ދާނީ އެ ޤައުމެއްގެ ކޮރަޕްޝަން ނައްތާލެވިގެންކަން މިއަދުގެ ސަރުކާރާ، މިއަދުގެ ރައީސުލްޖުމްހޫރިއްޔާ ޤަބޫލުކުރައްވާކަން މަޖިލީހުން ފެނިގެންދާ ކަމަށެވެ.
ރައްޔިތުން ދާ އޮހޮރޮވައިގެން ހޯދާ ފައިސާ ވަކި ބަޔަކު ބޭނުން ކުރަންވުމުން ބާރުގެ ބޭނުންކޮށްގެން އެ ބޭނުން ކުރާ ގޮތަށް އޮންނަ އޮތުން ނިންމުމަކަށް ގެންނަން ޖެހޭ ކަމަށް މެންބަރު ވިދާޅުވިއެވެ. މިފަދަ ބިލެއް މަޖިލީހަށް ހުށަހަޅާ ރާއްޖޭގައި ކޮރަޕްޝަން މުޅިން ނައްތާލެވޭނެ ނިޒާމަކަށް މި ޤައުމު ބައްޓަން ވެގެން ކުރިއަށްދާނެކަމަށާއި މީގެ ގިނަ ގުނަ މަންފާތައް ދިވެހި ރައްޔިތުންނަށް ކުރާނެ ކަމީ ދެބަސް ވެވޭނެ ކަމެއް ނޫން ކަމަށް މެންބަރު ވިދާޅުވިއެވެ.
އެމްއެމްޕީއާރުސީ މިސާލަކަށް ނަންގަވާ މެންބަރު ވިދާޅުވީ އެތައް ހާސް ރުފިޔާއެއް ވީނުވީ އެއް ނޭނގި ގެއްލިފައިވާ ކަމަށެވެ. މިފަދަކަންތައްތަކާ މެދު ވިސްނަންޖެހޭ ކަމަށާއި ޤައުމެއް ޤައުމެއްގެ ގޮތުގައި ކުރިއަރައިގެންދާނީ އެ ޤައުމުގައި ކޮރަޕްޝަން ނައްތާލެވިގެން ކަމަށް މެންބަރު ވިދާޅުވިއެވެ.
ހަގީގަތަކީ މި ދުނިޔޭގައި ތާއަބަދަށް ނުތިބެވޭނެކަމަށާއި ނިމުމެއް އަންނާނެ ކަމަށް މެންބަރު ވިދާޅުވިއެވެ.