ފުށިދިއްގަރުފަޅުގައި ކުރިޔަށްގެންދިޔުމަށް ސަރުކާރުން ސޮއިކުރި މަޝްރޫޢަކީ އަނެއްކާވެސް އެއާމެދު ވިސްނަންޖެހޭ ފަދަ ޑިޕްލޮމެޓިކް ހާލަތެއްގެ ހަތަރު އަނގޮޅިއަކަށް ދިވެހިން ގެންދާ ހިނދުކޮޅެއްކަމަށް އެމްޑީޕީގެ ކުރީގެ ރައީސް އަދި އެމްޑީޕީ ސަރުކާރުގެ ފޮރިން މިނިސްޓަރުކަން ކުރެއްވި އަބްދުﷲ ޝާހިދު ވިދާޅުވެއްޖެއެވެ.
އެމްޑީޕީގެ ފަސް ވަނަ ކޮންގްރެސް ނިންމުމަށް ރިޔާސަތުން ވާހަކަދެއްކުމުގެ ފުރުސަތު ދެއްވުމުން ދެއްކެވި ވާހަކަފުޅުގައި ޝާހިދު ވަނީ މިސަރުކާރުން ގެންގުޅޭ ޑިޕްލޮމެޓިކް ސިޔާސަތަށް ފާޑުވިދާޅުވެފައެވެ. އެގޮތުން ޝާހިދު ވިދާޅުވީ މިސަރުކާރުގައި ގުޑް ގަވަރނަންސް އާއި ޓްރާންސްޕޭރެންސީގެ ކަންފުޅެއްވެސް ނެތުމުން ފުށިދިއްގަރުފަޅުގައި ކުރިޔަށްގެންދިޔުމަށް ސަރުކާރުން ސޮއިކުރި އެއްބަސްވުމުގައި އޮތީ ކޯއްޗެއްކަން އެނގޭ އެކަކުވެސް ނެތްކަމަށެވެ. ޝާހިދު ވިދާޅުވީ އެކަމުގެ ސަބަބުން ރައްޔިތުންނަށް އެކި ގޮތްގޮތަށް އެމަޝްރޫޢާ ގުޅޭގޮތުން ވާހަކަދައްކަންޖެހިފައިވާކަމަށެވެ.
އޭގެނަތީޖާއަކަށް ވާނީ ޝާހިދު ވިދާޅުވާ ގޮތުންނަމަ އެކުވެރި ދައުލަތަކާއި މޫނު ކެނޑުމެވެ. ޝާހިދު ވަނީ ދިވެހި ދައުލަތާއި ބޭރުގެ ބޮޑެތި ކުންފުނިތަކާ ދެމެދު ވެވޭ އެއްބަސްވުންތައް ސިއްރުނުކޮށް ހާމަކުރަން ގޮވާލައްވާފައެވެ.
ޝާހިދު ވިދާޅުވީ ރާއްޖެއަށް ގުދުރަތުން ލިބިފައިވާ އެންމެ ބޮޑު ނަސީބަކީ ހަމައެކަނި ވަތަނުގެ ރީތިކަމާއި ޗާލުކަން ނޫންކަމަށެވެ. ޖިއޮގްރަފީގޮތުން ރާއްޖެ އޮތްތަނަކީވެސް ޑިޕްލޮމެޓިކް ގޮތުން ދިވެހިން ދުނިޔޭގެ ފެންވަރުގައި ބާރުގަދަކަން ހާމަކުރެވެން އޮތްކަމެއްކަމަށް ޝާހިދު ވިދާޅުވިއެވެ. ނަމަވެސް އެކަމުގެ ހަގީގީ އަގު އެނގޭނީ ބޭނުންކުރަން އެނގޭ ބަޔަކަށްކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ކޮވިޑްގެ އާލަމީ ވަބާގައި ބޯޑަރުތައް ބަންދުކޮށްފައި އޮތްއިރުވެސް ދިވެހިން ބަނޑަށް ނުޖެހި މެނޭޖްކުރެވުނީ ޑިޕްލޮމެސީގެ ގޮތުން އެކަން ކުރަން އެނގޭ ބަޔަކު ވެރިކަމުގައި ތިބުމުންކަމަށެވެ. އެހެންކަމުން ކުރިޔަށް އޮތްތަނުގައިވެސް ދުނިޔޭގެ ގައުމުތަކާއި ގުޅިގެން އެފަދަ ވެރިކަމެއް ކުރެވޭނީ އެމްޑީޕީއަށް ކަމަށް ޝާހިދު ވިދާޅުވިއެވެ.
ޝާހިދުގެ ވާހަކަފުޅުގައި ވަނީ އެމްޑީޕީން ރައްޔިތުންގެ ދިރިއުޅުމަށް ގެނައި އުންމީދުގެ ހުޅުކޮޅު މިސަރުކާރުން ނިއްވާލާފައިވާކަމަށް ވިދާޅުވެ މިސަރުކާރުގެ ސިޔާސަތުތަކަށް ފާޑުވިދާޅުވެފައެވެ.
ޝާހިދު ވަނީ ކައުންސިލުތައް މިހާރަށްވުރެ ބޮޑަށް ހަރުދަނާކުރުމަށް ސަރުކާރަށް ގޮވާލައްވާފައެވެ. ކައުންސިލުތަކާއި ޑަބްލިޔުޑީސީ މިހާރަށްވުރެ ބޮޑަށް ބާރުވެރިކުރުވާ މުސާރަ އާއި އިނާޔަތްތައް އިތުރުކުރުމަށް ގޮވާލެއްވިއެވެ.
ރަނގަޅު ހެޔޮ ބޮޑެތި ބަދަލުތައް ގެނެވޭނީ މަޝްވަރާކޮށްގެން ހައްލު ހޯދައިގެން ކަމަށާއި އެމްޑީޕީން އަނެއްކާވެސް ދިވެހި ރައްޔިތުންނަށް ހެޔޮ ބަދަލުތަކެއް ގެނައުމަށް މަޝްވަރާއަށް ދާން ނިންމި ނިންމުމަކީ އެމްޑީޕީގެ ހަރުދަނާކަން ދިވެހިންނަށް ސާބިތުކޮށްދޭ ކަމެއްކަމަށް ޝާހިދު ވިދާޅުވިއެވެ.