ދިވެހި ރައްޔިތުންނަށް މިއަދާ ހަމައަށް މިހާ ފަސޭހަކަމާއި އުފަލާއެކު މިތިބެވުނީ އެންމެ ފުރަތަމަ ޤައުމު އިސްކޮށްގެން ޤައުމަށްޓަކައި އިހްލާސްތެރިކަމާއެކީގައި ބަޔަކު ކުރި މަސައްކަތުގެ ސަބަބުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިރޭ ބޭއްވި ޕީއެންސީގެ ކޮންގެރެސް ނިންމުމުގެ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، އެ ޕާޓީގެ ފިކުރަކީ އިހްލާސްތެރިކަމާއެކު އެންމެ ފުރަތަމަ ޤައުމު އިސްކުރުން ކަމަށެވެ. އަދި މާތް ﷲ ދެއްވާފައިވާ ބުއްދީގެ ނިއުމަތް ބޭނުންކޮށް، އެކަލާނގެ މަތި ކުރައްވާފައިވާ ޒިންމާ އިހްލާސްތެރިކަމާއެކީގައި އަދާކޮށް، އެންމެ ފުރަތަމަ ޤައުމު އިސްކޮށްގެން އަންނާން އޮތް ޖީލުތަކަށް ޤައުމު ފޯރުކޮށްދޭނެ ބަޔަކަށް ވާންޖެހޭ ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ އެންމެ ފުރަތަމަ ޤައުމު އިސްކުރުމުން ހުރިހާ ރައްޔިތުން ހަމަހަމަވާނެ ކަމަށާއި، ރައްޔިތުންނަށް އަދުލުވެރިކަމާއި އިންސާފާއެކީގައި ހިދުމަތް ކުރެވޭނީވެސް އެ ފިކުރުގެ ތެރެއިން ކަމަށެވެ. އަދި އެ ފިކުރުގައި އެންމެ އިސް ކަމަކީ މާތްވެގެންވާ އިސްލާމް ދީން ކަން ރައީސް ފާހަގަކުރެއްވިއެވެ.
އެގޮތުން ޕީއެންސީގެ އަސާސަކީ މާތްވެގެންވާ ދީނުގެ އަސާސް ކަމަށް ވިދާޅުވެ ރައީސް ވަނީ، މި ސަރުކާރުން އެންމެ ފުރަތަމަ ސިކުންތުން ފެށިގެން މިއަދާ ހަމައަށްވެސް ޤައުމުގެ ކަންކަން ކުރަމުން އައިސްފައި ވަނީ އަދި ކުރެވޭތޯ މަސައްކަތް ކޮށްފައި ވަނީ ވެސް އިސްލާމް ދީނުގައި ބަޔާންކޮށްފައިވާ ކަންތައްތަކަށް ނަސްރުދީގެން ކަމަށެވެ.