ސިޔާސީ މަސައްކަތް ކުރެވޭނީ މަގުމައްޗަށް ނިކުމެގެން ކަމަށް ސަރުކާރު ހިންގާ ޕާޓީ، ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާލުވެއްޖެއެވެ.
ޕީއެންސީގެ މަތީ މަޖިލިސް އިފްތިތާހްކުރުމަށް ބޭއްވި ޖަލްސާގައި ވާހަކަ ދައްކަވަމުން އަބްދުއްރަހީމް ވިދާލުވީ، ސިޔާސީ މަސައްކަތަކީ އެއްގޮތަކަށްވެސް ގޭގައި ތިބެގެން ކުރެވޭ ކަހަލަ މަސެއްކަތެއް ނޫން ކަމަށެވެ.
އަބްދުއްރަހީމް ވިދާޅުވީ އެ މަސައްކަތް ކުރެވޭނީ މަގުމައްޗައް ނިކުމެ، ކަނޑުމައްޗަށް އަރައި، ފަޅުމަތީގައި ހިނގައި އަދި ރައްރަށް ދަތުރުކޮށް، ހޮޅުއަށިތަކަށް ގޮސް، ބަދިގެ އަށްވަދެ، ގޭގެއަށް ވެދެ، މީހުންނާ ވާހަކަ ދައްކައި، ހިންހެޔޮކަން ދައްކައިގެން ކަމަށެވެ.
އަބްދުއްރަހީމް އިތުރަށް ވިދާޅުވީ، ކޮންގްރެސް ޕާޓީގެ މެމްބަރުންނަކީ ވަރަށް ފަހުރުވެރި ބައެއް ކަމަށާއި، ދިވެހި ރައްޔިތުންނަށް ހިދުމަތްކުރުމުގައި ޕީއެންސީގެ މެމްބަރުންނަކީ ނަމުނާ ބައެއް ކަމަށްވެސް އޭނާ ވިދާޅުވި އެވެ. އަދި ޕީއެންސިގެ މެމްބަރުން ކަންކަމާއި ކުރިމަތި ލަނި އަޒުމު އައު ކޮށްގެން ކަން ފާހަގަކުރައްވާ އަބްދުއްރަހީމް ވިދާޅުވީ ކަމެއް ދިމާވާ ވަގުތު، ޕީއެންސިގެ މެމްބަރުންނަކި ގެއަށްވަދެ ފިލަ ބައެއް ނޫން ކަމަށެވެ.
އަބްދުއްރަހީމް ވިދާޅުވީ، އަލުން އައު ހިތްވަރަކާއެކީގައި މަސައްކަތް ކުރަންވީ ވަގުތު އައިސް ޖެހިފައިވާ ކަމަށެވެ. އަދި މެމްބަރުންގެ އިރުޝާދާއި އެއްގޮތަށް އަތޮޅުތަކަށް ދަތުރުތަކެއް އިންތިޒާމް ކުރައްވަން ރައިސުލްޖުމްހޫރިއްޔާ ޑރ. މުހައްމަދު މުއިއްޒު، ޕީއެންސީގެ ލީޑާޝިޕަށް އަންގާފައިވާ ކަންވެސް އަބްދުއްރަހީމް ވަނީ ހާމަކުރައްވާފައެވެ.
އަބްދުއްރަހީމް ވިދާޅުވީ، ބަލަންވީ ރައިސް މުއިއްޒުގެ ސިޔާސަތަށް ކަމަށެވެ.
އެގޮތުން، ރައީސް މުއިއްޒު މި ގައުމަށް ހަވާލުވީ، އިނދަޖެހިފައިވާ އިގްތިސޯދަކާއި އެކުގައިކަން ފާހަގަކުރައްވާ އަބްދުއްރަހީމް ވިދާޅުވީ، ދަރަނީގެ ރަޝީދަކާ އެކުގައި، ތެދުވެ މިއަދު އެ ދަރަނި ދައްކަމުން، ގައުމުގެ ރައްޔިތުންގެ އަސާސީ ކަންކަމަށް ބުރު ނާރާނެހެން ތަރައްގީގެ މަޝްރޫއުތަކައިގެން ކުރިއަށްދާތީ، ރައީސް މުއިއްޒުގެ ސިޔާސަތާއި މެދު ފިކުރު ހިންގަން ޖެހޭ ކަމަށެވެ. އަދި އެ ސިޔާސަތާއި އެއްގޮތަށް އަމަލުކުރަން ޖެހޭ ކަމަށްވެސް އަބްދުއްރަހީމް ވިދާޅުވިއެވެ.
މީގެ އިތުރުން، މި ގައުމުގެ މިނިވަން ކަމަށްޓަކައި، އަމާން ކަމަށްޓަކައި، ހަމަޖެހުމަށްޓަކައި، ސުލްހަވެރި ކަމަށްޓަކައި، އަދި މާދަމައިގެ މުސްތަގުބަލަށްޓަކައި، އެމެން އެކުގައި 2028 ވަނަ އަހަރުގެ ރިޔާސީ އިންތިހާބު ރައިސް މުއިއްޒު އަށް ކާމިޔާބު ކޮށްދިނުމަށް އަޒުމު އައު ކޮށްގެން ނިކުންނަން ޖެހޭ ކަމަށްވެސް އަބްދުއްރަހީމް ވިދާޅުވެފައިވެއެވެ.