އެއްވެސް ސިޔާސީ ލީޑަރަކަށް މިހާރު އެއްވެސް ބިރުވެރިކަމެއް ނޯންނާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ޕީއެންސީގެ މަތީ މަޖިލިސް އިފްތިތާހްކުރުމަށް ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، މި ސަރުކާރުން ރާއްޖޭގައި ސިޔާސީ ހަމަޖެހުން ގާއިމްކޮށްފައިވާނެ ކަމަށެވެ.
ރައީސް ވަނީ ސަރުކާރަށް ތިން އަހަރުވާން ގާތްވެފައި ވާއިރު، އެއްވެސް ސިޔާސީ ލީޑަރަކު ޖަލަށް ލާފައި ނުވާނެ ކަމުގައި ފާހަގަކުރައްވާފައެވެ. އަދި ސިޔާސީ ގޮތުން ބަދަލު ހިފުމަށް އެއްވެސް ކަމެއް ކޮށްފައި ނުވާނެ ކަމަށްވެސް ރައީސް ވިދާޅުވި އެވެ.
ރައީސް އިތުރަށް ވިދާޅުވީ ޕީއެންސީގެ ސިޔާސަތަކީ، ވަށާޖެހޭ ހަގީގީ ތަރައްގީއާއި، ހަމަޖެހުން އަދި ރައްކާތެރިކަން ހޯދައިދިނުން ކަމަށެވެ.
މީގެ އިތުރުން، ރައްކާތެރިކަން މާނަކުރަނީ ވަރަށް ފުޅާ ދާއިރާއެއްގައި ކަން ފާހަގަކުރައްވާ ރައީސް ވިދާޅުވީ، މިނިވަން ކަމާއި، ސިޔާދަތާއި އިސްތިގުލާލު ހިމާޔަތް ކުރުމާއި، އިޖުތިމާއީ ރައްކާތެރިކަން އަދި އަމަން އަމާންކަން ރައްކާތެރި ކުރުންވެސް އޭގެތެރޭގައި ހިމެނޭ ކަމަށެވެ.
ރައީސް ވަނީ އުނދަގޫ ބޮޑެތި މައްސަލަތަކަށް އެޑްރެސްކުރަން ފެއްޓެވީ އެހެންވެ ކަމަށް ވިދާޅުވެފަ އެވެ.
ރައީސް ވިދާޅުވީ، ޕީއެންސީގެ ސިޔާސަތު، އަދި ފަލްސަފާ މިގޮތުގައި ކުރިއަށްދާނެ ކަމަށެވެ.