މަސްތުވާތަކެތި ބޭނުންކުރާ ފަރާތްތަކަށް ފަރުވާދިނުމާއި ރީހެބިލިޓޭޝަނާ ގުޅޭ އިންޓަރ-އޭޖެންސީ ފޯރަމް ބާއްވައިފިއެވެ.
ފުލުހުން ބުނީ“ރީވިޒިޓިންގ ގެޕްސް އެންޑް ރިކަވަރީ އިން ދަ ސައުތު” ނަމުގައި މި ފޯރަމް ބާއްވާފައިވަނީ، މި ސެޕްޓެމްބަރު މަހުގެ 6 އިން 7 އަށް ކެނަރީފް ރިސޯޓް މޯލްޑިވްސްގައި ކަމަށެވެ.
މި ފޯރަމް ނިންމުމަށް ބޭއްވި ރަސްމިއްޔާތު ޝަރަފުވެރިކޮށްދެއްވީ ކޮމިޝަނަރ އޮފް ޕޮލިސް އަޙްމަދު މުޙައްމަދުއެވެ. މި ރަސްމިއްޔާތުގައި، ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީއާއި، ޕްރޮސެކިއުޓަރ ޖެނެރަލްގެ އޮފީހާއި، ޑްރަގް ކޯޓާއި ނޭޝަނަލް ޑްރަޖް އެޖެންސީގެ އިސް ވެރިންގެ އިތުރުން ސައުތު ޕޮލިހުގެ އިސްވެރިން ބައިވެރިވެރިވެލެއްވިއެވެ.
ފުލުހުން ބުނީ މި ފޯރަމަކީ މަސްތުވާތަކެތީ ބޭނުންކުރާ ފަރާތްތަކަށް ފަރުވާ ދިނުމާއި މަސްތުވާތަކެތި ބޭނުންކުރާ ފަރާތްތައް އަލުން މުޖުތަމައަށް ނެރުމުގައިހުރި ގޮންޖެހުންތައް ދެނެގަނެ، ކަމާ ގުޅުންހުރި ފަރާތްތަކުގެ މެދުގައި މަޝްވަރާކުރުމަށް ބޭއްވި ފޯރަމެއް ކަމަށެވެ.
މި ފޯރަމުގައި، ކަމާ ގުޅުންހުރި މުއައްސަސާތައް ގުޅިގެން، ދެކުނުގެ ސަރަހައްދުގައި ފަރުވާއާއި، ރިހެބިލިޓޭޝަން އަދި ރިކަވަރީ މަރުހަލާގައި ހުރި ދަތިތަކާއި، ހުރަސްތަކާއި، މުއައްސަސާތަކުގެ މަސައްކަތްތައް އެއް މިސްރާބަކަށް ބައްޓަންކުރުމާއި، އެހީތެރިކަން އިތުރުކުރެވޭ ނެ ގޮތްތަކާ ގުޅޭގޮތުން ހިޔާލު ބަދަލުކޮށް މަޝްވަރާކޮށްފައިވެއެވެ.
މި ފޯރަމުގައި ސައުތު ފޮލިހާއި، ޑްރަގް އެންފޯސްމަންޓާއި، ނޭޝަނަލް ޑްރަގް އޭޖެންސީއާއި، ޑްރަގް ކޯޓުގެ އިތުރުން ޕްރޮސެކިއުޓަރ ޖެނެރަލްގެ އޮފީހާއި ގިރިންދާ ޖަމުއިިއްޔާއިން ބައިވެރިވިއެވެ.