އިނގިރޭސި ޕްރިމިއާ ލީގުގައި އާސެނަލުން 1-0 ގެ ހަނި ފަރަގަކުން އެސްޓަން ވިލާ ބަލިކޮށްފި އެވެ.
މިއީ މި ސީޒަންގެ ލީގުގައި، އެންމެ ފަހުގެ ޗެމްޕިއަން އާސެނަލުން ހޯދި ދެވަނަ މޮޅެވެ. އަނެއްކޮޅުން އެސްޓަން ވިލާ މިވަނީ ލީގުގައި ކުޅުނު ދެ މެޗުން ވެސް ބަލިވެފަ އެވެ.
އެސްޓަން ވިލާގެ ދަނޑުގައި ރޭ ކުޅުނު މެޗުގައި އާސެނަލަށް ލަނޑު ޖަހައިދިނީ އިނގިރޭސި ފޯވާޑް ބުކާޔޯ ސަކާ އެވެ. އެ ޓީމުގެ ޑިފެންޑަރު ރިކާޑޯ ކަލަފިއޯރީ ދިން ބޯޅައަކުން ސަކާ މި ލަނޑު ޖެހީ މެޗުގެ 59 ވަނަ މިނެޓުގަ އެވެ.
ސަކާ ވަނީ ފުރަތަމަ މެޗުގައި އާސެނަލުން 3-0 އިން ކޮވަންޓްރީ ސިޓީ އަތުން މޮޅުވި މެޗުގައި ވެސް ލަނޑު ޖަހާފަ އެވެ.
ރޭގެ މެޗުން ބަލިވި އެސްޓަން ވިލާ ވަނީ ލީގުގައި ކުޅުނު ފުރަތަމަ މެޗުން ބްރައިޓަން އަތުން 4-0 އިން ބަލިވެފަ އެވެ. އެހެންކަމުން އެ ޓީމު މިވަގުތު އޮތީ ތާވަލުގެ އެންމެ ފުލުގަ އެވެ.
އެސްޓަން ވިލާއަށް ދެން އޮތީ ހޮނިހިރު ދުވަހުގެ ރޭ ހަލް ސިޓީއާ ވާދަކުރާ މެޗެވެ. އަދި އާދީއްތަ ދުވަހުގެ ރޭ އާސެނަލް ނުކުންނާނީ ޗެލްސީއާ ދެކޮޅަށެވެ.