މަސްވެރި ސިނާއަތުގައި ހުރި ގޮންޖެހުންތައް ހައްލުކުރެވޭނީ މަސްވެރިން ބާރުވެރިކުރުވައިގެން ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ވަޒީރު މިފަދައިން ވިދާޅުވީ، "އާރުވެރި މެޗިންގ ގްރާންޓު" އިފްތިތާޙް ކުރުމަށް ބޭއްވި ހާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ.
ވަޒީރު ވިދާޅުވީ، މަސްވެރި ސިނާއަތް ތަރައްގީ ކުރުމަށާއި، މި ސިނާއަތުގައި ހުރި ގޮންޖެހުންތައް ހައްލުކުރުމަށް ކުރަންހުރި މަސައްކަތްތައް ވަރަށް ގިނަ ކަމަށާއި، މި މައްސަލަތަކަކީ ހަމައެކަނި ސަރުކާރަށް އެކަނި ހައްލުކުރެވޭނެ ކަންކަން ނޫން ކަމަށެވެ.
ވަޒީރު ވިދާޅުވީ، ރާއްޖޭގައި ޒަމާނުއްސުރެ ދެމެހެއްޓެނިވި މަސްވެރިކަމެއްބކުރުމަށް އެ ސިނާއަތުގައި އަދިވެސް ގިނަ ގޮންޖެހުންތަކެއް އެބަހުރި ކަމަށެވެ. އެގޮތުން މި ގޮންޖެހުންތައް ހައްލުކުރުމަށްޓަކައި އެންމެ މުހިންމު އެއް ވަސީލަތަކީ ފައިސާ ނުވަތަ އިންވެސްޓްމަންޓް ކަމުގައި ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމާޒަކީ ރާއްޖޭގެ މަސްވެރި ސިނާއަތުގައި ހުރި މައްސަލަތައް ހައްލުކުރުމުގައި އަމިއްލަ ކުންފުނިތަކަށް ފަހި މާހައުލެއް އުފައްދައިދީ، ހުރިހާ އެންމެން ގުޅިގެން ގޮންޖެހުންތައް ހައްލުކުރެވޭނެ ހަރުދަނާ ނިޒާމެއް ގާއިމުކުރުން ކަމަށެވެ.