ދަރުމަވަންތަ ސްކޫލަށް ބޭނުންވާ ޒަމާނީ ހޯލެއް އެޅުމަށް އެ ސްކޫލާ އިންވެގެން ހުރި މާލޭ ޖަލުގެ އިމާރާތް ތަޅާލައި ބިން ހުސްކުރުމުގެ މަސައްކަތް ސަރުކާރުން ފަށައިފިއެވެ.
މީޑިއާއަކަށް ދެއްވި އިންޓަވިއުއެއްގައި ތައުލީމާއި މަތީ ތައުލީމާ ބެހޭ ވަޒީރު ޑރ. އިސްމާއީލް ޝަފީއު ވިދާޅުވީ، ދަރުމަވަންތަ ސްކޫލުގެ ދަރިވަރުންނަށް ދިމާވެފައިވާ ހޯލުގެ ދަތިކަން ހައްލުކޮށްދިނުމުގެ ގޮތުން، ޖަލު ތަޅާލުމުގެ މަސައްކަތް ކޮންޓްރެކްޓަރަކާ ހަވާލުކޮށްގެން މިހާރު ކުރިއަށްދާ ކަމަށެވެ.
ވަޒީރު ވިދާޅުވީ، އަމާޒަކީ މިއަހަރުގެ ފަހު ކުއާޓަރުގެ ނިޔަލަށް އެ ސަރަހައްދު އެއްކޮށް ސާފުކޮށް ނިންމައި، މާލޭގައި ހުންނާނެ އެންމެ ފުރިހަމަ ވަސީލަތްތައް އެކުލެވޭ މަލްޓިޕާޕަސް ހޯލު ބިނާކުރުމުގެ މަސައްކަތް ފެށުން ކަމަށެވެ.
2023 ވަނަ އަހަރު ދަރުމަވަންތަ ސްކޫލުގެ އައު އިމާރާތުގައި ކިޔަވައިދޭން ފެށިއިރު، އެތަނުގައި ހޯލެއް އަޅާފައެއް ނުވެއެވެ. އެގޮތުން، ކުރީ ސަރުކާރުން ޖަލު ބިން ހުސްކޮށްގެން ހޯލު އަޅަން ނިންމާފައިވީ ނަމަވެސް، ސްކޫލް ހުޅުވުނުއިރު ވެސް އެކަން އޮތީ ނުވެ އެވެ. އަދި ހޯލެއް ނެތުމުން މިހާރު ވަގުތީ ގޮތުން ބޭނުން ކުރަމުން ދަނީ އިމާރާތްތަކުގެ ދެމެދުގައި އޮންނަ ހުސް ޖާގަތައްކަމަށްވެސް މައުލޫމާތު ލިބެ އެވެ.
އެހެންކަމުން، މި މައްސަލައަށް ދާއިމީ ހައްލެއް ގެނެސްދިނުމަށް ރައީސް ޑރ. މުހައްމަދު މުއިއްޒުގެ ސަރުކާރުން އިސްކަންދީގެން ކުރިއަށްގެންދާ މި މަޝްރޫއު ނިމުމުން، ސްކޫލުގެ އެކި ހަރަކާތްތަކަށް އެކަށޭނަ ތަނަވަސް އަދި ޒަމާނީ ޖާގައެއް ލިބިގެންދާނެ ކަމަށް ސަރުކާރުން ގަބޫލުކުރެ އެވެ.