މި އަހަރުގެ މިހާތަނަށް ރާއްޖޭގައި 1،140 ޑްރަގް އޮޕަރޭޝަން ކުރިއަށް ގެންގޮސްފައިވާ ކަމަށް ހެޑް އޮފް ޑްރަގް އެންފޯސްމެންޓް، ސުޕައިންޓެންޑެންޓް އޮފް ޕޮލިސް އަހްމަދު މުސްލިމް ވިދާޅުވެއްޖެ އެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމެއްގައި، މަސްތުވާތަކެއްޗާ ދެކޮޅަށް ކުރަމުންދާ މަސައްކަތްތަކަށް އަލިއަޅުވާލައްވަމުން މުސްލިމް ވިދާޅުވީ، މި އަހަރުގެ ޖުލައި މަހުގެ 31 ވަނަ ދުވަހާ ހަމައަށް މާލެ ސަރަހައްދުގައި ޖުމްލަ 530 އަށް ވުރެއް ގިނަ ޑްރަގް އޮޕަރޭޝަން ކުރިއަށް ގެންގޮސްފައިވާ ކަމަށެވެ.
މީގެ އިތުރުން ސަދަން ޕޮލިހުން 281 އޮޕަރޭޝަން ކުރިއަށް ގެންގޮސްފައިވާ އިރު، ނޮދަން ޕޮލިހުން 329 އޮޕަރޭޝަން ކުރިއަށްގެންގޮސްފައިވާ ކަމުގައި ފަހަގަކުރައްވާ މުސްލިމް ވިދާޅުވީ، މި އަހަރު ޖުމްލަކޮށް ރާއްޖޭގައި ޑްރަގާ ދެކޮޅަށް 1،140 އޮޕަރޭޝަން ކުރިއަށް ގެންގޮސްފައިވާ ކަމަށެވެ.
މުސްލިމް ވިދާޅުވީ، އެއީ ވޭތުވެދިޔަ 7 މަސް ދުވަހަށް ބަލާކަމުގައި ވާނަމަ އެވެރެޖްކޮށް ދުވާލަކަށް 5 އޮޕަރޭޝަން ކަމަށެވެ. އަދި އެ އޮޕަރޭޝަންތަކުގެ ތެރެއިން ޖުމްލަކޮށް 1875 މީހުން މަސްތުވާތަކެއްޗާ ގުޅުންހުރި ތަފާތު މައްސަލަތަކުގައި ހައްޔަރު ކޮށްފައިވާކަމަށް މުސްލިމް ވިދާޅުވި އެވެ.
މުސްލިމް އިތުރަށް ވިދާޅުވީ، ފުލުހުން ކުރިއަށް ގެންގޮސްފައިވާ އޮޕަރޭޝަންތަކާއި، ފުލުހުންގެ މަސައްކަތުގެ ތެރެއިން މަސްތުވާތަކެތީގެ މައްސަލަތަކަށް ގުޅުން ހުރިކަމަށް ތުހުމަތުކުރެވޭ މީހުން، ގްރޭޓާ މާލެ ސަރައްދުން 14،370 ފަހަރު ބަލައިފާސްކޮށްފައިވާ ކަމަށެވެ. އަދި ސަދަން ޕޮލިހުން 5،400 އަށް ވުރެއް ގިނަ މީހުން ބަލައިފަސްކޮށްފައިވާ އިރު، ނޮދަން ޕޮލިހުން 3،470 އަށް ވުރެއް ގިނަ މީހުން ބަލައިފާސްކޮށްފައިވާ ކަމަށްވެސް މުސްލިމް ވަނީ ވިދާޅުވެފަ އެވެ.
މީގެއިތުރުން މުސްލިމް ވިދާޅުވީ ޖުމްލަކޮށް ރާއްޖެއިން 144 ކިލޯ އަށް ވުރެއް ގިނަ މަސްތުވާތަކެތި ފާއިތުވި 7 މަސްދުވަހު އަތުލައިގަންފައިވާ ކަމަށެވެ.
މުސްލިމް ވިދާޅުވީ މަސްތުވަތަކެތީގެ މައްސަލަތަކުގެ ގޮތުގައި ކޭސްކޮށްގެން ޖުމްލަކޮށް 1،533 މައްސަލަ އެއް ތަހުގީގު ކުރިއަށް ގެންގޮސްފައިވާ ކަމަށެވެ.