އިގްތިސާދީ އަދި ޢުމްރާނީ ގޮތުން ކިތަންމެ ބޮޑު ތަރައްޤީއެއް ހޯދިކަމުގައި ވީ ނަމަވެސް، އެ އަސްލަށް ރުޖޫއަވެގެން ކުރިއަށްދިއުމުގެ ވިސްނުން ނުގެންގުޅޭނަމަ، ހަގީގީ މިނިވަންކަމެއް ނުލިބޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ދައުލަތުގެ މީޑިއައިން ގެނެސްދޭ ސިލްސިލާ ޕޮޑްކާސްޓް "ނޭޝަން ޗެޓް"ގައި ވާހަކަފުޅުދައްކަވަމުންނެވެ.
އެ މަނިކުފާނު ވިދާޅުވީ، ދިވެހީންގެ އަސްލަށް ރުޖޫޢަވުމުގެ ވިސްނުމާ ނުލާ ކިތަންމެ ގިނަ އިމާރާތްތަކެއްކޮށް، މާއްދީ ކިތަންމެ ކުރިއެރުމެއް ހޯދިކަމުގައި ވީ ނަމަވެސް، އެލިބިގެންދަނީ ހަގީގީ މިނިވަންކަމެއް ނޫންކަމުގައި ދެކެވަޑައިގަންނަވާކަމަށެވެ.
ރައީސް ވިދާޅުވީ، އަމިއްލަ އަތުން ހެދޭ ގޯސްތަކަކީ ރަނގަޅު ނުކުރެވޭނެ ކަމެއް ނޫން ކަމަށާއި، އަދުގެ ސަރުކާރުން އިސްނަންގަވައިގެން ކުރައްވަމުން ގެންދަވަނީ އެ މަސައްކަތްކަމަށެވެ.
އިހްތިރާމް އަދާކުރުމުގެ ގައުމީ ކެމްޕޭނެއް ހިންގެވުމަށް އެމަނިކުފާނުގެ ސަރުކާރުން ކުރައްވަމުން ގެންދަވާ މަސައްކަތްތަކުގެ އަދާހަމަ ހިއްސާކުރައްވަމުން ރައީސް ވަނީ، މިއީ ހަމައެކަނި ކެމްޕޭނެއް ނޫން ކަމަށާއި، މިއީ ހުރިހާ އެންމެންގެ ބައިވެރިވުމާއެކު ގައުމީ ފެންވަރުގައި ކުރެވޭ ބޮޑު މަސައްކަތެއް ކަމުގައި ފާހަގަކުރައްވާފައެވެ.