ޒަކާތު ފަންޑުން އިންވެސްޓް ކުރަނީ ފަޤީރުންނާއި މިސްކީނުންގެ ހައްޤަށް އެއްވެސް އުނިކަމެއް ނާންނާނެހެން ކަމަށް ދިވެހިރާއްޖޭގެ ޒަކާތު ހައުސްއިން ބުނެފިއެވެ.
ދައުލަތުގެ މީޑިއަގެ ޕްރޮގްރާމެއްގައި ވާހަކަ ދައްކަވަމުން ޒަކާތު ހައުސްގެ ޑިރެކްޓަރ ޖެނަރަލް އައްޝައިޚު އިމްތިތާޢު ޢައްބާސް ވިދާޅުވީ، ޒަކާތު ފަންޑުން އިންވެސްޓްކުރާއިރު ޝަރުޢީ އަސާސްގައި އޮންނަ ގޮތަށް ޝަރުތުތަކާއެކު މަސައްކަތް ކުރާ ކަމަށާއި މި ފަންޑަކީ ފަޤީރުންނާއި މިސްކީނުންގެ މުދާ އޭގައި ހިމެނޭ އެއްޗަކަށްވާއިރު، ފަންޑުން އިންވެސްޓް ކުރާނީ އެމީހުންގެ ޙައްޤަށް އެއްވެސް އުނިކަމެއް ނާންނާނެހެންކަމަށެވެ.
ޒަކާތު ފަންޑުން އިންވެސްޓް ކޮށްގެން ހުޅުމާލެއާއި މާލޭގައި ވަޤުފު އިމާރާތް ތަރައްޤީކުރުމާއި، ހުޅުމާލޭގައި 20،000 އަކަފޫޓުގެ ބިމެއްގައި ދާރުލްސަލާމް ވަޤުފު އިމާރާތް ތަރައްޤީ ކުރާއިރު، މާލޭގައި 2000 އަކަފޫޓުގެ ބިމެއްގައި ދާލުލް އަރުޤަމް ތަރައްޤީ ކުރުމުގެ މަސައްކަތްތައް ދަނީ ކުރަމުންނެވެ.
ޒަކާތު ފަންޑު ހިންގުމާ ބެހޭ ޤަވާއިދުގައިވާ ގޮތުން އެ ފަންޑަށް ޖަމާކުރަނީ، މުދަލު ޒަކާތާއި ފިޠުރު ޒަކާތުގެ ގޮތުގައި ލިބޭ ފައިސާގެ އިތުރުން ފަންޑުން ޤާއިމްކުރާ އިންވެސްޓްމަންޓުތަކުން ލިބޭ ފައިސާއެވެ. އަދި މި ފަންޑު ހިންގުމުގެ ޒިންމާ މަތިކޮށްފައިވަނީ، ޒަކާތުގެ ޤާނޫނުގެ ދަށުން ޒަކާތު ހައުސްއަށެވެ.
ޤަވާއިދުގައިވާ ގޮތުން ޒަކާތުގެ ގޮތުގައި ދައުލަތަށް ލިބޭ ފައިސާއިން ޒަކާތުގެ ބެހެނިވެރީންނަށާއި ބޭނުންތަކަށް ދޫކުރާ މިންވަރު އިތުރު ކުރުމުގެ މަޤުސަދުގައި، ޒަކާތު ފަންޑުގައިވާ ފައިސާ އިންވެސްޓް ކުރެވިދާނެއެވެ. ނަމަވެސް އެކަން ކުރުމަށް އެޑްވައިޒަރީ ކޮމިޓީގެ ލަފާ ހޯދަން ޖެހެއެވެ.
ޒަކާތުގެ ފައިސާ އިންވެސްޓްކުރާނީ، މޯލްޑިވްސް ޒަކާތު ހައުސްއިން އަދި އެހެން ފަރާތްތަކާ ގުޅިގެން އިންވެސްޓް ކުރާނަމަ އިންވެސްޓް ކުރަންވާނީ، އިސްލާމީ ޝަރީޢަތާ އެއްގޮތްވާ ގޮތުގެ މަތީން ހިންގާ، ހަމައެކަނި ސަރުކާރުގެ ފަންޑުތަކާއި ދައުލަތުގެ މުއައްސަސާތަކާ އެކުގައިކަމަށް ޤަވާއިދުގައިވެއެވެ. މީގެ އިތުރުން ފަންޑުގެ ދަށުން ހަދައިފައިވާ އިންވެސްޓްމަންޓުތަކުގެ ހާލަތު ދެނެގަނެ، އެ އިންވެސްޓްމަންޓުތަކުގެ ކަންކަން ޒަކާތު ހައުސްއިން ޤަވާއިދުން މޮނިޓަރ ކުރަންޖެހެއެވެ.
މި ޤަވާއިދުގައި ބަޔާންކޮށްފައިވާ ގޮތުން ކޮންމެ އަހަރަކު ޒަކާތު ފަންޑު އޮޑިޓްކޮށް، އޮޑިޓަރ ޖެނެރަލް ރައްޔިތުންގެ މަޖިލީހަށް ހުށަހަޅަން ޖެހެއެވެ. އެގޮތުން މީލާދީ ކޮންމެ އަހަރެއް ނިމުމުން އެ އަހަރަކު ޒަކާތު ފަންޑު ހިންގި ގޮތުގެ އަހަރީ ރިޕޯޓު ތައްޔާރުކޮށް، އެ އަހަރެއް ނިމޭތާ 3 މަސް ދުވަހުގެ ތެރޭގައި ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް ހުށަހަޅަންވެސް ޖެހެއެވެ.