ފީފާ ވޯލްޑް ކަޕްގެ ފައިނަލުން ބަލިވުމުން ލިބުނު ހިތާމައިން އަރައިގަންނަން ދިގު މުއްދަތެއް ހޭދަވާނެ ކަމަށް އާޖެންޓީނާގެ ކެޕްޓަން ލިއޮނަލް މެސީ ބުނެފި އެވެ.
މިދިޔަ އާދީއްތަ ދުވަހުގެ ރޭ ކުޅުނު ވޯލްޑް ކަޕްގެ ފައިނަލްގައި ސްޕެއިން އަތުން އާޖެންޓީނާ ބަލިވީ 1-0 އިންނެވެ. އާޖެންޓީނާގެ ފަރާތުން ދަށް ކުޅުމެއް ފެނުނު އެ މެޗުގައި މެސީއަށް ވެސް ޓީމަށް ފައިދާހުރި ކަމެއް ކޮށްދެވޭ ގޮތެއް ނުވި އެވެ.
މި ނާކާމިޔާބީއަށް ފަހު މެސީ ރޭ އިންސްޓަގްރާމްގައި ކުރި ޕޯސްޓްގައި ބުނީ، ފައިނަލުން ބަލިވުމުން ތަދާއި ހިތްދަތިކަން ކުރިމަތިވެފައިވާ ކަމަށެވެ.
ފައިނަލުން ބަލިވި ނަމަވެސް، މެސީ ވަނީ ވޯލްޑް ކަޕްގައި އާޖެންޓީނާގެ ފަރާތުން ފެނުނު ރަނގަޅު ކަންތައްތަކުގެ ހަނދާން އާކޮށްފަ އެވެ. އެގޮތުން ފަހަތުން އަރައި މޮޅުވި މެޗުތަކާއި، މުޅި މުބާރާތުގައި ކުޅުންތެރިން ދެއްކި ހިތްވަރު އޭނާ ފާހަގަކޮށްފައިވެ އެވެ.
މީގެއިތުރުން މެސީ ވަނީ އޭނާއަށާއި ޓީމަށް ހިތްވަރުދިން ހުރިހާ ފަރާތްތަކަށް ޝުކުރު އަދާކޮށްފަ އެވެ. އަދި އާޖެންޓީނާ މިފަހަރުވެސް ފައިނަލާ ހަމައަށް ދަތުރުކުރީ މުޅި ޓީމާއި ގައުމުގެ ރައްޔިތުން އެކަތިގަނޑެއްގެ ގޮތުގައި ކުރި މަސައްކަތުން ކަމަށް މެސީ ބުނެފައިވެ އެވެ.
މެސީގެ ޕޯސްޓް ނިންމާލާފައިވަނީ ޗެމްޕިއަންކަން ހޯދި ސްޕެއިނަށް މަރުހަބާ ކިޔަމުންނެވެ.
މެސީ ވަނީ 2022 ވަނަ އަހަރު އާޖެންޓީނާއާއެކު ވޯލްޑް ކަޕްގެ ތަށި އުފުލާލައިފަ އެވެ. ނަމަވެސް ތަށި ދިފާއުކުރަން ނުކުމެ މިފަހަރުގެ ފައިނަލްގައި އާޖެންޓީނާއަށް އެ ޓީމުގެ ކުޅުން ދެއްކޭ ގޮތެއް ނުވި އެވެ. ސްޕެއިނުން އާޖެންޓީނާއަށް ކުޑަވެސް ފުރުސަތެއް ނުދީ މުޅި މެޗު ޑޮމިނޭޓްކޮށްގެން ކުޅުމުގެ ނަތީޖާއަކަށްވީ، އާޖެންޓީނާއަށް މެޗު ނިމެންދެން ޑިފެންސް ކުރަން ޖެހުމެވެ.
އެ މެޗުގެ ފުރިހަމަ ވަގުތު ހަމަވިއިރު އާޖެންޓީނާއަށް ގޯލަށް އެންމެ ބޯޅައެއް ވެސް ފޮނުވާލެވިފައެއް ނުވެ އެވެ. މިއާއެކު، ވޭތުވެދިޔަ 60 އަހަރުގެ ތެރޭގައި، ވޯލްޑް ކަޕް ފައިނަލެއްގައި 90 މިނެޓު ހަމަވިއިރު ގޯލަށް އެންމެ ޝޮޓެއް ވެސް ނުޖެހުނު ހަމައެކަނި ޓީމަކީ އާޖެންޓީނާ އެވެ.
މެސީގެ ފަހު ވޯލްޑް ކަޕްގައި، ފައިނަލުން ނާކާމިޔާބީއާ ކުރިމަތިލާން ޖެހުނު ނަމަވެސް، އެނާ ވަނީ މުބާރާތުގައި އަށް ލަނޑު ޖަހައި، ހަތަރު ލަނޑު ޖަހަން ފުރުސަތު ތަނަވަސްކޮށްދީފަ އެވެ. އަދި ފަސް މެޗުގެ މޮޅު ކުޅުންތެރިޔާގެ އެވޯޑް ހޯދައި، މުބާރާތުގެ ގިނަ ރެކޯޑްތަކެއް ވެސް ހަދާފައިވާކަން ފާހަގަކޮށްލެވެ އެވެ.