ބޭންކް އޮފް މޯލްޑިވްސް (ބީ.އެމް.އެލް) އިން ޑޮލަރު ގަތުމަށް ހުޅުވާލި ފުރުސަތަށް ރައްޔިތުންގެ ތާއީދެއްނެތް ކަމަށް ގަލޮޅު އުތުރު ދާއިރާގެ ކުރީގެ މެންބަރު އީވާ އަބްދުﷲ ވިދާޅުވެއްޖެއެވެ.
އީވާ މިފަދައިން ވިދާޅުވީ، ރޭ އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ކުރިއަށް ގެންދިޔަ "ޑޮލަރެއް ނެތް" ޕެނަލް ޑިސްކަޝަންގައި ވާހަކަ ދައްކަވަމުންނެވެ.
އީވާ ވިދާޅުވީ، އެމްއެމްއޭ އިން ޑޮލަރު ނެގުމަށް 15.42 ގެ ރޭޓު އިން އިރު، ބީއެމްއެލްއިން ޔޫއެސް ޑޮލަރ އިންވެސްޓްމަންޓް އޮޕްޗިއުނިޓިީ ގެ ނަމުގައި 19 ރުފިޔާއަށް ޑޮލަރު ގަތުމަށް ހުޅުވާލި ފުރުސަތަށް ފެނިގެން ދިޔައީ ރައްޔިތުންގެ ތަރުހީބުގެ ބަދަލުގައި ސުވާލު އުފެދިގެން ދިޔަ މަންޒަރު ކަމަށެވެ.
ރައްޔިތުންގެ މެދުގައި ސުވާލު އުފެދިގެން ދިޔަ ސަބަބު ތަފްސީލުކޮށް ދެއްވަމުން އީވާ ވިދާޅުވީ، މޭ މަހުގެ ތެރޭގައި ބީއެމްއެލްގެ އެއްވެސް ކާޑަކުން އެއްވެސް ވިޔަފާރި އަކަށް އެއް މަސް ދުވަސް ވަންދެން އެއްވެސް ވަގުތެއްގައި ޑޮލަރު ނުކެނޑޭ ކަމަށެވެ. އެހެން ނަމަވެސް ޖޫން މަހު ބީއެމްއެލް އިން މި ފުރުސަތު ހުޅުވާލައި އިއުލާނު ކުރިއިރު އެ ދެހާލަތު އެއްވެސް ވަރަކަށް ދިމާނުވާ ކަމަށެވެ.
އެގޮތުން ތިންކަމަކަށް ރައްޔިތުންގެ ހިތުގައި މިކަމާ މެދު ސުވާލު އުފެދޭކަން ފާހަގަކުރައްވައި އީވާ ވިދާޅުވީ، އެއްކަމަކަށް ސުވާލު އުފެދެނީ އިންވެސްޓްމަންޓް ޕްރޮޑަކްޓެއް ބީއެމްއެލް އިން ނުދެއްކުމާ ދެވަނަ ކަމަކަށް ބީއެމްއެލްގައި ޑޮލަރު ނެތްކަން ރައްޔިތުންނަށް އެނގުމުގެ އިތުރުން، ބީއެމްއެލްގައި ހުރި ޑޮލަރުތައް ދިޔައީ ސަރުކާރަށް ކަން ރައްޔިތުންނަށް އިނގޭތީ ކަމަށެވެ.
އީވާ ވިދާޅުވީ، ބީއެމްއެލް އިން ހުޅުވާލާފައި އެވާ ފުރުސަކީ މީހަކަށް ފައިދާ ވާނެ ގޮތަކަށް ހުޅުވާލާފައިވާ ފުރުސަތެއް ނޫން ކަމަށެވެ.
އީވާ ވިދާޅުވީ، ބީއެމްއެލްގެ އެ ފުރުސަތަށް ކަޅުބާޒާރެކޭ ނުކިޔޭނެ އެއްވެސް ސަބަބެއް ނެތް ކަމަށެވެ.
ބީއެމްއެލްގެ އެފުރުސަތަށް ހުރި ކަންބޮޑުވުން ފާހަގަ ކުރައްވައި އީވާ ވިދާޅުވީ، މި ފުރުސަތާ ގުޅިގެން އެމްއެމްއޭގެ ބަހެއް މިހާތަނަށް ލިބިފައި ނުވާ ކަމަށެވެ. އެގޮތުން އީވާ ވަނީ ބީއެމްއެލްގެ އެ ފުރުސަތު ހުޅުވާލާފައިވަނީ އެމްއެމްއޭއަށް ނޭންގިތޯ ސުވާލު އުފައްދަވާފައެވެ.
މީގެ އިތުރުން އީވާ ވިދާޅުވީ، އެމްއެމްއޭގޭ އެފަދަ ބޮޑު ޒިންމާއެއް އޮތް އިރު ބަހެއް ނުބުނުން އެއީ ރައްޔިތުންވެސް ކަންބޮޑުވާ ކަމެއް ކަމަށެވެ. އެގޮތުން ޑޮލަރު މައްސަލާގައި ހުރިހާ ފެއިލިއާއެއް ހުއްޓެނީ އެމްއެމްއޭ އާ ހިސާބުން ކަމަށް އީވާ ވިދާޅުވިއެވެ.