މޫސުމީ ބަދަލުތަކުން ކުރާ އަސަރުތައް ކުޑަކުރުމާ ގުޅޭގޮތުން ޔުނިސެފާއެކު މަޝްވަރާކޮށްފިއެވެ.
މި ބައްދަލުވުން ބާއްވާފައިވަނީ އެންވަޔަރަންމަންޓް މިނިސްޓަރ ޢަލީ ޝަރީފާއި، ޔުނިސެފުން ދިވެހިރާއްޖެއަށް ކަނޑައަޅުއްވާފައި ހުންނަވާ މަންދޫބު ޑރ. އެޑްވަރޑް އަޑާއީއާ ދެމެދުގައެވެ.
އެ ބައްދަލުވުމުގެ މައިގަނޑު މަގުސަދަކީ މޫސުމީ ބަދަލުތަކަށް ހޭނުމަށާއި، އެފަދަ ބަދަލުތަކުން ކުރާ ނޭދެވޭ އަސަރުތަކަށް ކުޑަކުދިންނާއި ޒުވާނުން އަހުލުވެރިކުރުވުމަށް ދެ ފަރާތް ގުޅިގެން ކުރެވިދާނެ މަސައްކަތްތަކާ މެދު މަޝްވަރާކުރުމެވެ.
އެ ބައްދަލުވުމުގައި ވަނީ މޫސުމަށް އަންނަ ބަދަލުތަކުގެ ސަބަބުން ކުޑަކުދިންނާއި ޒުވާނުންނަށް ކުރިމަތިވާ ގޮންޖެހުންތަކުން އަރައިގަތުމަށާއި، އެ ފަރާތްތަކުގެ ރައްކާތެރިކަން ކަށަވަރުކުރުމާ ގުޅޭގޮތުން މަޝްވަރާކޮށްފައެވެ.
އަދި ތިމާވެށީގެ މައްސަލަތަކުގައި ކުޑަކުދިންގެ ބައިވެރިވުން އިތުރުކުރުމާއި، މޫސުމީ ކަންކަމުގައި ދިފާއީ ނިޒާމު ވަރުގަދަކުރުމަށް އިސްކަންދޭންޖެހޭ މުހިންމު ދާއިރާތަކާ ބެހޭގޮތުން ދެ ބޭފުޅުން ވަނީ ފުޅާ ދާއިރާއެއްގައި ވާހަކަދައްކަވާފައެވެ.
އެ ބައްދަލުވުމުގައި މިނިސްޓަރ ޢަލީ ޝަރީފް ވަނީ މޫސުމީ ބަދަލުތަކަކީ ރާއްޖެ ފަދަ ނާޒުކު ތިމާވެއްޓެއް އޮތް ގައުމަކަށް ކުރިމަތިވެފައިވާ އެންމެ ބޮޑު އެއް ނުރައްކާކަން ފާހަގަކުރައްވާފައެވެ.
އަދި އެ ކަމުގައި ޔުނިސެފުން ފޯރުކޮށްދޭ އެހީތެރިކަމަށް މިނިސްޓަރު ވަނީ ޝުކުރު އަދާކުރައްވާފައެވެ.
ހަމައެހެންމެ ޑރ. އެޑްވަރޑް އަޑާއީ ވަނީ ކުޑަކުދިންގެ ކުރިމަގު އުޖާލާކުރުމަށާއި ތިމާވެށީގެ ރައްކާތެރިކަމަށް ދިވެހި ސަރުކާރުން ކުރައްވަމުންދާ މަސައްކަތްތަކަށް ތައުރީފު ކުރައްވާފައެވެ.
މި ބައްދަލުވުމުގެ ސަބަބުން ކުރިއަށް އޮތް ތަނުގައި މޫސުމީ ބަދަލުތަކުން ކުޑަކުދިންނާއި ޒުވާނުންނަށް ކުރާ އަސަރުތައް ކުޑަކުރުމަށް ހިންގޭ މަޝްރޫއުތަކަށް އިތުރު ކުރިއެރުމެއް ލިބިގެންދާނެއެވެ.