ރ. އަލިފުށި ހޮސްޕިޓަލާއި އެއާޕޯޓްގެ މަސައްކަތް މި ދައުރު ތެރޭ ނިންމައި، ހުޅުވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މި ސަރުކާރުން ވެރިކަމާ ހަވާލުވީއިރު ޞިއްޙީ ނިޒާމު އޮތީ ވަރަށް ނިކަމެތި ޙާލަތެއްގައިކަން ފާހަގަކުރައްވައި، ރައީސުލްޖުމްހޫރިއްޔާ ވިދާޅުވީ، މިހާރު ކުރަމުންދާ މަސައްކަތްތަކަކީ ހުރިހާ ފަރާތްތަކަކަށްވެސް ފުރިހަމަ ޚިދުމަތް ލިބޭނެ ފަދަ ވަށާޖެހޭ ޞިއްޙީ ނިޒާމެއް ޤާއިމުކުރުން ކަމަށެވެ.
އެގޮތުން ބައެއް މަޝްރޫޢުތައް އެންމެ އެދޭ ބާރުމިނުގައި ކުރިއަށް ނުދާކަން ރައީސް ވަނީ ފާހަގަކުރައްވާފައެވެ. އެއީ އެމަސައްކަތްތައް ނުކުރުމަކަށް ނޫން ކަމަށް ރައީސް ވިދާޅުވިއެވެ.
ރައީސް ވިދާޅުވީ ރ. އަލިފުއްޓަކީ ސަރަޙައްދީ ތަރައްޤީގައި މުހިންމު ދައުރެއް އަދާކުރާ ރަށަކަށް ވުމާއެކު، އެ ރަށުގެ އެއާޕޯޓާއި ހޮސްޕިޓަލްގެ މަޝްރޫޢު ހިމެނޭހެން ވެވަޑައިގެންފައިވާ ހުރިހާ ވަޢުދުތަކަކީވެސް ޚާއްޞަ ސަމާލުކަމެއްދީގެން ކުރިއަށްގެންދާނެ ކަންކަން ކަމަށެވެ.
މި ދެ މަޝްރޫއު މިދައުރު ތެރޭގައި ނިންމާފައި ހުވޭނެ ކަމަށް ރައީސް ވިދާޅުވިއެވެ. މިހާރު ވަނީ ހޮސްޕިޓަލްތައް އަދި ހެލްތް ސެންޓަރުތައް ނިންމުމަށް އެކި މަރުހަލާތަކުގައި ހުރި ހޮސްޕިޓަލްތަކާއި ހެލްތް ސެންޓަރުތައް ނިންމުމަށްޓަކައި ތާވަލެއް އެކުލަވައިލާފައިކަމަށްވެސް ރައީސް ވިދާޅުވިއެވެ.
އަލަށް އިމާރާތްކުރާ ހޮސްޕިޓަލްތަކަކީ ކޯވިޑް ފަދަ ބަލިތައް ފެތުރޭ ޙާލަތް ތަކުގައި ހޮސްޕިޓަލުގެ އޮޕަރޭޝަން ނުހުއްޓި ކުރިޔަށް ގެންދެވޭ ގޮތަށް ފްލޫ ކްލިނިކާއި، އައިސޮލޭޝަން ފެސިލިޓީ ހިމެނިގެން ހެދޭ ހޮސްޕިޓަލްތަކެކެވެ. މީގެ އިތުރުން ހޮސްޕިޓަލުން ބޭނުންކުރާ ހަކަތައަށް ކުރާ ޚަރަދު ކުޑަ ކުރުމުގެ ގޮތުން މި ޕްރޮޖެކްޓުގެ ދަށުން ކޮންމެ ހޮސްޕިޓަލެއްގައި ސޯލަރ ޕީވީ ސިސްޓަމް ހަރުކުރުމަށް ވަނީ ހަމަޖެހިފައެވެ.