އަންނަ އަހަރު ތެރޭގައި ފުލުހުންގެ "ޑްރޯން އޭޒް ފަސްޓް ރެސްޕޮންޑަރ" ޚިދުމަތް ތަޢާރަފްކުރާނެކަމަށް ދާހިލީ ސަލާމަތާއި، މަސައްކަތްތެރިކަމާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ.

ފުލުހުންގެ މުއައްސަސާއަށް 93 އަހަރުފުރުމުގެ މުނާސަބަތުގައި ބޭއްވި ހާއްސަ ރަސްމިއްޔާތުގައި ވާހަކަ ދައްކަވަމުން ވަޒީރު އިހުސާން ވިދާޅުވީ ރައީސުލްޖުމްހޫރިއްޔާ ޑރ މުހައްމަދު މުއިއްޒު ގެންދަވަނީ ފުލުހުންގެ މުއައްސަސާއަށް ބޭނުންވާ އެންމެ ޒަމާނީ ޓެކްނޮލޮޖީ ހޯދައިދިނުމުގެ މަސައްކަތްތައް ކުރަމުންކަމަށެވެ. އެގޮތުން ފުލުހުންގެ ޑްރޯންގެ ޚިދުމަތާއެކު ހާދިސާއެއްގެ ރިޕޯޓު ފުލުހުންނަށް ލިބުމާއެކު އެސަރަހައްދަށް ޑްރޯން ދާނެކަމަށެވެ. އަދި އެސަރަހައްދުގެ ހާލަތު ވީޑިއޯގެ ޒަރީއާއިން ވަގުތުން ފުލުހުންނަށް އެނގެމުންދާނެކަމަށް ވަޒީރު ވިދާޅުވިއެވެ.

މި ޚިދުމަތުގެ ސަބަބުން ފުލުހުންނަށް އިންސިޑެންޓެއް ރިޕޯޓުކުރުމާއިއެކު ފުލުހުންގެ ޑްރޯން އެސަރަހައްދަކަށް ޑިޕްލޮއި ކުރެވި ރެސޕޮންޑްކުރާ އޮފިސަރުންނާއި ކޮމާންޑް ސެންޓަރަށް ތަނުގެ ހާލަތު ވިޑިއޯގެ ޒަރިއްޔާއިން ވަގުތުން އަންގަމުންދާނެ. އެއްގަމުގެ ޓްރެފިކާއި އަދި ކަނޑު ހުރަސްކޮށް ޚިދުމަތްފޯރުކޮށްދޭން ދާންޖެހޭ ހާލަތުގައި ފުލުހުން އެހިސާބަށް ދިއުން ލަސްވިޔަސް ޑްރޯންގެ އެހީގައި ވަގުތުން އެތަނެއްގެ ހާލަތު ދެނެގަނެވި މިހާރަށްވުރެ އެފިޝިއެންޓްކޮށް ޚިދުމަތްދެވިގެންދާނެ.

އަލީ އިހުސާން/ދާހިލީ ސަލާމަތާއި، މަސައްކަތްތެރިކަމާއި ފަންނިއްޔާތާ ބެހޭ ވަޒީރު

މީގެއިތުރުން ވަޒީރު އިހުސާން ވިދާޅުވީ ފުލުހުންގެ ކޮމާންޑް އެންޑް ކޮންޓްރޯލް ސެންޓަރުގައި ހުރި 911 އިމަރޖެންސީ ރެސްޕޮންސް ސެންޓަރުގެ ޤާބިލުކަން އިތުރުކުރުމަށް ނެކްސްޓް ޖެނެރޭޝަން ކޯލް ހޭންޑްލިންގ އިކުއިޕްމަންޓާއި، އެހީއަށްއެދި ގުޅާފަރާތުގެ ލޮކޭޝަން ވަގުތުން ދެނެގަނެވޭނެގޮތާއި އެހިސާބެއްގައި ހަރުކުރެވިފައިވާ ފުލުހުންގެ ކެމެރާފީޑްތައް ވަގުތުން ފެންނަގޮތަށް ސިސްޓަމް އަޕްގްރޭޑްކުރެވިގެންދާނެ ކަމަށެވެ.

ވަޒީރު އިތުރަށް ވިދާޅުވީ ފުލުހުންގެ މަސައްކަތުގައި ބޭނުންކުރާ ޓެކްނޮލޮޖީ ހޮސްޓުކުރުމަށް އެންމެ ޒަމާނީ ޑޭޓަރ ސެންޓަރެއް އުޅުމުގެ އަމަލީ މަސައްކަތް މިހާރުވަނީ ފެށިފައިކަމަށެވެ.

ފުލުހުންގެ އުމްރާނީ ތަރައްގީއަށް މިސަރުކާރުން ކުރަމުންދާ މަސައްކަތްތައް ފާހަގަކުރައްވަމުން ވަޒީރު ވިދާޅުވީ ރައީސް ޑރ މުހައްމަދު މުއިއްޒު ދައުލަތްހިންގެވުމާއި ހަވާލުވަޑައިގަތްއިރު ފުލުހުންގެ އަމިއްލަ މަރުކަޒު ހުރީ އެއްމެ 17 ރަށުގައިކަމަށެވެ. އަދި އޭރު ޚިދުމަތް ދެމުންގެންދިޔަ އަނެއް 100 ރަށުގައި ފުލުހުން ޚިދުމަތް ދެމުން ގެންދިޔައީ ފުރިހަމަ މަރުކަޒެއްނެތި ވަރަށްވެސް އުނދަގުލުގައިކަމަށެވެ.

އިހުސާން ވިދާޅުވީ މިދައުރު ނިމުމުގެ ކުރިން ފުލުހުން ގާއިމުވެ ތިބޭ ހުރިހާ ރަށެއްގައި ފުލުހުންގެ ޚިދުމަތަށް އެކަށީގެންވާ މަރުކަޒުތައް ހުންނާނީ ގާއިމުވެފައިކަމަށެވެ.

މިކަން ވަރަށް ކައިރިންބައްލަވައި ދައުލަތުން ކިތައްމެ ބޮޑު ޚަރަދެއްކުރަންޖެހުނަސް ދިވެހިރައްޔިތުންނާއި ފުލުހުންގެ ހައްޤުގައި ރައީސުލްޖުމްހޫރިއްޔާވަނީ ފުލުހުންގެ 93 އަހަރުވީ ދިގު ތާރީޚުގައި ހިންގޭ އެއްމެ ބޮޑު އިންފްރާސްޓަރަކްޗަރގެ މަސައްކަތް ފައްޓަވާފައި. މިކަމުގެ ނަތީޖާއެއްގެ ގޮތުން ފާއިތުވި އަހަރު އެކަނިވެސްވަނީ އަލަށް އިމާރާތްކުރަން ފެށުނު 5 ފުލުހުންގެ މަރުކަޒެއް ނިންމައި ޚިދުމަތަށް ނެރެވިފައި. މާތްﷲގެ އިރާދަފުޅާއިއެއު މި ދައުރު ނިމުމުގެ ކުރިން ފުލުހުން ޤާއިމުވެ ތިބޭހުރިހާ ރަށެއްގައި ފުލުހުންގެ ޚިދުމަތަށް އެކަށީގެންވާ މަރުކަޒުތައް ހުންނާނީ ޤާއިމުވެފައި.

އަލީ އިހުސާން/ ދާހިލީ ސަލާމަތާއި، މަސައްކަތްތެރިކަމާއި ފަންނިއްޔާތާ ބެހޭ ވަޒީރު

ވަޒީރު ވަނީ ޒަމާނީ، ޕްރޮފެޝަނަލް ފުލުހުން ބިނާކުރުމާއި އަދި ކަމަށް އެކަށީގެންވާ ވަސީލަތްތަކާއި ތަމްރީނާއި ބޭރުގެ ފަރާތްތަކާއި އެކު ގުޅުން ބަދަހިކުރުމަށް ފަހިކޮށްދޭންޖެހޭ ހުރިހާ ކަމެއް ފަހިކޮށްދޭނެކަމުގެ ޔަގީންކަން ފުލުހުންނަށް އަރުވާފައެވެ.