ރައްޔިތުންގެ މަޖިލީހުގައި ކުރާ ބަހުސްތަކުގައި މަޖިލީހުގެ ރައީސް އަބްދުއްރަހީމް އަބްދުﷲ މެންބަރުން ދައްކަވާ ވާހަކައަށް އާއްމު ގޮތެއްގައި ރައްދު ނުދެއްވި ނަމަވެސް މިއަދުގެ ބަހުސްގައި ބައެެއް މެންބަރުންނަށް ރަައްދު ދެއްވައިފި އެވެ.
އަބްދުއްރަހީމް އެންމެ ފުރަތަމަ ރައްދު ދެއްވީ މިއަދުގެ ޖަލްސާގައި 20 ވަނަ ރައްޔިތުންގެ މަޖިލީހަކީ "ރަބަ ސްޓޭމްޕް މަޖިލީހަކަށް" ބަދަލުވަމުންދާ ކަމަށް ވިދާޅުވެ، ގަލޮޅުދެކުނު ދާއިރާގެ މެންބަރު މީކާއީލް އަހުމަދު ނަސީމު ދެއްކެވި ވާހަކަ އަށެވެ.
އެގޮތުން ދުންފަތުން ނަގާ ޑިއުޓީ ކުޑަކުރަން ސަރުކާރުގެ ފަރާތުން ކޮމަންޑޫ ދާއިރާގެ މެންބަރު މުހައްމަދު އިބްރާހީމް ހުށަހެޅުއްވި ބިލުގެ ބަހުސްގައި މީކާއީލް ވިދާޅުވީ ސަރުކާރު ޖަވާބުދާރީކުރުވަން މަޖިލީހަށް ކުރެވެން އޮންނަ މަސައްކަތެއް ނުކުރާތީ ހިތާމަކުރައްވާ ކަމަށެވެ.
އެ ވާހަކައަށް ޖަވާބުދެއްވަމުން މެންބަރު މީކާއީލަކީ 19 ވަނަ ރައްޔިތުންގެ މަޖިލީހުގެ ވެސް މެންބަރެއް ކަމަށާއި އެ މަޖިލީހުގައި ކަން ހިނގައިދިޔަ ގޮތް އެނގިވަޑައިގަންނަވާނެ ކަމަށް އަބްދުއްރަހީމް ވިދާޅުވި އެވެ.
މީގެ އިތުރުން އަބްދުއްރަހީމް ވަނީ ދުންފަތުން ޑިއުޓީ ބޮޑުކުރުމުގެ ފަހަތުގައި އޮތީ ވައްކަން ކަމަށް ތުހުމަތުކުރައްވައި ހަނިމާދޫ ދާއިރާގެ މެންބަރު އަބްދުލްގަފޫރު މޫސާ (ގަޕޯ) ދެއްކެވި ވާހަކަ އަށްވެސް ރައްދު ދެއްވާފަ އެވެ.
ދުންފަތުގެ ޑިއުޓީ ކުޑަކުރާ ބިލުގެ ބަހުސްގައި ގަފޫރު ވަނީ ތަކުރާރުކޮށް، ދުންފަތުގެ ޑިއުޓީ ބޮޑުކުރީ "ވައްކަމުގެ މާކެޓެއް އުފައްދަން" ކަމަށް ތުހުމަތު ކުރައްވާފައެވެ.
އެހެންކަމުން ގަފޫރަށް ރައްދު ދެއްވަމުން އަބްދުއްރަހީމް ވިދާޅުވީ އެމަނިކުފާނަށް ބަހުސްގައި ބައިވެރިވެވަޑައިނުގެންނެވޭ ކަމަށާއި ނަމަވެސް ވައްކަން ކުރި ސަރުކާރުތަކާ މެދު ރައްޔިތުން އަމަލުކުރިކޮށް މާޒީގައި ފެނިފައިވާ ކަމަށެވެ.
ރައްޔިތުންގެ މަޖިލީހުގެ ޖަލްސާތަކުގައި މެންބަރުން ދައްކަވާ ވާހަކަތަކަށް ރިޔާސަތުން އާއްމުގޮތެއްގައި ރައްދު ދޭނީ ރިޔާސަތަށް ފާޑުކިޔައި ނުވަތަ ތުހުމަތުތެއް ކުރާ ހާލަތުގަ އެވެ.
އެއާ ހިލާފަށް ބަހުސްގެ ތެރެއަށް މާބޮޑަށް ވެެދެވަޑައިގަންނަވާތީ 19 ވަނަ ރައްޔިތުންގެ މަޖިލީހުގެ ރައީސްގެ ހައިސިއްޔަތުން ކުރީގެ ރައީސް މުހައްމަދު ނަޝީދަށް އޭރު ފާޑުކިއުންތައް އަމާޒުވި ނަމަވެސް 20 ވަަނަ ރައްޔިތުންގެ މަޖިލީހުގެ ރައީސްގެ ހައިސިއްޔަތުން އަބްދުއްރަހީމް މީގެ ކުރިން އެގޮތަކަށް އަމަލެއް ނުކުރައްވަ އެވެ.