ޑިޖިޓަލް ބިލަކީ ބައިނަލްއަގުވާމީ މާކެޓްތަކަށް ވަނުމަށް އޮތް އެންމެ ކުރުމަގު ކަމުގައި މިލަންދޫ ދާއިރާގެ މެމްބަރު ހަސަން މުފީދު ވިދާޅުވެއްޖެއެވެ.
މެމްބަރު މުފީދު މިފަދައިން ވިދާޅުވީ، ގައްދޫ ދާއިރާގެ މެންބަރު މުޙައްމަދު ޢަލީ ހުށަހަޅުއްވާފައިވާ، މޯލްޑިވްސް 2.0 ޑިޖިޓަލް ޓްރާންސްފޮމޭޝަންގެ ބިލަށް ބަހުސް ކުރައްވަމުންނެވެ.
މި ބިލު މުހިންމު ވަނީ ޑިޖިޓަލް އިގްތިސާދަކަށް ބަދަލުވުމުންކަން ފާހަގަ ކުރައްވައި މެމްބަރު މުފީދު ވިދާޅުވީ، ދިވެހި އުފެއްދުންތަކާ ހިދުމަތްތަކުގެ އިތުރުން ހާއްސަކޮށް ފަތުރުވެރިކަމާ މަސްވެރިކަމުގެ ދާއިރާ ދުނިޔޭގެ ކޮންމެ ތަނެއްގައި ހުރެގެން ވެސް ފަސޭހަ ކަމާއެކު ގަނެ ވިއްކުމުގެ ފުރުސަތު ޑިޖިޓަލް ބިލުގެ ސަބަބުން ފަހިވެގެން ދާނެތީ ކަމަށެވެ.
މުފީދު ވިދާޅުވީ ދިވެހި ރާއްޖޭގައި ސިޓީ ބިޓީ ބަދަލުކުރި ޒަމާނަށް ވުރެން ދުނިޔެ މިހާރު ތަހުޒީބު ވެފައިވާ ކަމަށާއި، އެގޮތުން ޓެކްނޮލޮޖީގެ އެހީގައި ގައުމު މިހާރު އެތައް ހަރުފަތްތަކެއް ހުރަސް ކޮށް ދުނިޔެ ތަރައްގީވެފައިވާ ކަމަށެވެ.
މެމްބަރު އިތުރަށް ވިދާޅުވީ، ހިދުމަތްތަށް ޑިޖިޓަލް ކުރުމުން ކަރުދާހަށް ކުރާ ހޭދަ ކުޑަވެ އިދާރާތަކުގެ މެދުގައި މައުލޫމާތު ބަދަލުކުރުން އަވަސް ވެގެންދާނެ ކަމަށް ގަބޫލުފުޅު ކުރައްވާ ކަމަށެވެ.