ކުރީގެ 3 ރައީސުން އެކުގައި މަސައްކަތް ކުރައްވަން ނިންމެވުމުގެ ފަހަތުގައި އޮތް އަސްލު ނިޔަތަކީ 2028 ވަނަ އަހަރުގެ ރިޔާސީ އިންތިހާބުގައި ރައީސް ޑރ. މުހައްމަދު މުއިއްޒުއާ އިދިކޮޅުން ވާދަކުރައްވާނެ ކެންޑިޑޭޓުގެ ޓިކެޓު ހޯއްދެވުން ކަމަށް ރައީސް އޮފީހުގެ ތަރުޖަމާން މުހައްމަދު ހުސެއިން ޝަރީފް (މުންދު) ވިދާޅުވެއްޖެ އެވެ.
ނޫސްވެރިންނާ އެކު މުންދު ބޭއްވި ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބުދެއްވަމުން އޭނާ ވިދާޅުވީ ކުރީގެ ތިން ރައީސުންގެ އިތުރުން މިދިޔަ ދެ އަހަރެއްހާ ދުވަހު ސިޔާސީ މައިދާނުން ނުފެނި ތިިބި އެތައް ބޭފުޅަކު "ކުއްލިއަކަށް ހޮރުހޮރުން" ނުކުމެވަޑައިގެން، ވަކި މަގުސަދެއް ހާސިލްކުރައްވަން ސަރުކާރަށް ފާޑުވިދާޅުވާން ފަށާފައިވާ ކަމަށެވެ.
އޭނާ ވިދާޅުވީ އެ ބޭފުޅުން އެ އުޅުއްވަނީ 2028 ގައި ރައީސް މުއިއްޒު ދެވަނަ ދައުރަކަށް އެދިވަޑައިގެން ރައްޔިތުންނާ ހަމައަށް ނުކުމެވަޑައިގަންނަވާއިރު، އެމަނިކުފާނާއި ވާދަކުރައްވާނެ ޓިކެޓުތައް ހޯދުމުގެ ނިޔަތުގައި ކަމަށް ގަބޫލުފުޅުކުރައްވާ ކަމަށެވެ.
މުންދު ވަނީ އިދިކޮޅު އެންމެ ބޮޑު ޕާޓީ އެމްޑީޕީން ވެސް މިހާރު އުޅެނީ މި އަންނަ ރިޔާސީ އިންތިހާބުގައި އެ ޕާޓީގެ ފަރާތުން ވާދަކުރާނެ ކެންޑިޑޭޓެއް ޔަގީން ނުވެގެން ނޫންތޯ ސުވާލު އުފައްދަވާފައެވެ.
ކުރީގެ ރައީސް މުހައްމަދު ނަޝީދާއި ކުރީގެ ރައީސް އަބްދުﷲ ޔާމީން އަދި ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ވަނީ ކްރިމިނަލް ކޯޓުގެ އަމުރަކާ ހިލާފުވެގެން ހައްޔަރުކޮށްފައިވާ ދެ ނޫސްވެރިންނާއި ސަރުކާރުން ނޫސްވެރިންނަށް އަޅަމުންދާ ފިޔަވަޅުތަކާ ގުޅިގެން އެކަމާ ދެކޮޅަަށް އެކުގައި މަސައްކަތް ކުރައްވަން ނިންމަވާފައިވާ ކަން އިއުލާން ކުރައްވައިފަ އެވެ.
މުންދު ވިދާޅުވީ އެ ތިން ރައީސުން ވެރިކަން ކޮށްފައި ހުރި ގޮތާއި އެ ވެރިކަންތަކުގައި ހިނގާފައި ހުރި ކަންކަމަށް ބަލައި، އަދި އެ ވެރިންނަށް ދެވަނަ ދައުރެއް ރައްޔިތުން ދީފައި ނުވުމަކީ ވެސް ވަރަށް ސުވާލު އުފެދޭ ކަންކަން ކަމަށެވެ.