އެމްޑީޕީގެ ޗެއާޕާސަންގެ އިންތިހާބުގެ ޓައިމްލައިން ބާތިލްކުރަން ކުރީގެ ރައީސް މުހައްމަދު ނަޝީދުގެ ޓީމުން ކޯޓަށް މައްސަލަ ހުށަހެޅުމަކީ ޕާޓީގެ އުސޫލުތަކާ ބީރައްޓެހި އަމަލެއް ކަމަށް، އެ މަގާމަށް ވާދަކުރައްވާ މީކާއިލް އަހުމަދު ނަސީމް މިއަދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި މީކާއިލް ވިދާޅުވީ، ޕާޓީގެ އެތެރޭގެ ކަންކަން ނިންމުމަށް ކޯޓަށް ދިއުމަކީ މަސްލަހަތު ނަގާލުން ކަމަށާއި، އިންތިހާބު ކަނޑައެޅިފައިވާ ތާރީޚު ކަމަށްވާ ޖޫން 12 ގައި ބާއްވަން ޖެހޭނެ ކަމަށެވެ. މީގެ އިތުރުން، އިންތިހާބު ފަށާފައި ވަނިކޮށް އުސޫލުތަކަށް ބަދަލު ގެނައުމަކީ ގަބޫލުކުރެވޭނެ ކަމެއް ނޫން ކަމަށްވެސް އޭނާ ފާހަގަކުރެއްވިއެވެ.
މީކާއިލް އިތުރަށް ވިދާޅުވީ، ޕާޓީގެ މާލީ ހާލަތު ދަށްވި ނަމަވެސް އަސާސީ އިންތިހާބުތައް ފަސްނުކުރެވޭނެ ކަމަށާއި، ޕާޓީގެ އިސް މަގާމުތަކުގައި ތިއްބަވަން ވާނީ އާންމު މެންބަރުންގެ ވޯޓުން އިންތިހާބުވާ ބޭފުޅުން ކަމަށެވެ.
ކުރިއަށް އޮތް ރިޔާސީ އިންތިހާބު ކާމިޔާބު ކުރުމަށްޓަކައި އެމްޑީޕީ އެކަތިގަނޑެއްގެ ގޮތުގައި އޮތުން މުހިންމުކަން ފާހަގަކުރައްވައި، އާންމު މެންބަރުން ބޭނުންވަނީ ހުރިހާ ކެންޑިޑޭޓުންނަށް ހަމަހަމަ ފުރުސަތު ދޭނެ "ނިއުޓްރަލް" ޗެއާޕާސަނެއް ކަމަށްވެސް މީކާއިލް ވިދާޅުވިއެވެ. ނަޝީދުގެ ފަރާތުން ކޯޓަށް މައްސަލަ ހުށަހެޅީ އިންތިހާބުގެ އިއުލާނަކީ އެމަނިކުފާނުގެ ކެމްޕޭނަށް ހުރަސްއެޅޭ ގޮތަށް އޮތް އެއްޗެއް ކަމަށް ބުނެއެވެ.