ގައުމީ ދާރުލްއާސާރު ކޮންމެ ހޮނިހިރު ދުވަހަކު ވެސް އާންމުންނަށް ހުޅުވަން ނިންމާފައިވާ ކަމަށް ހެރިޓޭޖް މިނިސްޓަރ، ހީނާ ވަލީދު ވިދާޅުވެއްޖެއެވެ.

މިނިސްޓަރު ހީނާ މިހެން ވިދާޅުވީ، މިއަދު ބޭއްވި ނޫސްވެރިންގެ ބައްދަލުވުމުގައި މައުލޫމާތު ހިއްސާކުރައްވަމުންނެވެ.

އެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ މިހާރު ދާރުލްއާސާރު ހުޅުވާފައި ހުންނަނީ ހަމައެކަނި ރަސްމީ ދުވަސްތަކުގައި އެކަނި ކަމަށެވެ.

އެހެން ނަމަވެސް، ގައުމީ ދާރުލް އާސާރުގެ ތަކެތި ބަލާލައި ދިރާސާކުރުމުގެ ފުރުސަތު ދިނުމުގެ ގޮތުން ކޮންމެ ހޮނިހިރު ދުވަހަކުވެސް އެތަން ހުޅުވަން ނިންމަވާފައިފާވާ ކަމަށް މިނިސްޓަރު ވިދާޅުވިއެވެ.

" މިހާރު ރަސްމީ ދުވަހު ހުޅުވައިފައި ހުރުމުގެ އިތުރުން އެކި ފަރާތްތަކުން އެ އެދިވަޑައިގަންނަވާ ގޮތުގެ މަތިން ވީހާވެސް ގިނަ ބޭފުޅުންނަށް ގައުމީ ދާރުލްއާސާރަށް ވަދެ އެ ތަނުގައި ހުރި ބައެއް ކަހަލަ ކަންތައްތައް ބަލައި ދިރާސާކޮށް އަދި ކިޔަވާ ކުދިންނަށާއި އަދި ރައްޔިތުން ވެސް ބޭނުންވާ ގަޑިތަކުގަ ވަދެވޭނެ ގޮތް ހެދުމުގެ ގޮތުން، ކޮންމެ ހޮނިހިރު ދުވަހެއްގެ ވެސް ހެނދުނު 10:00 ހަވީރު 4:00 އެގޮތުން، 18 މެއި 2026 އިން ފެށިގެން އަޅުގަނޑުމެން ކޮންމެ ހޮނިހިރު ދުވަހެއްގަ ގައުމީ ދާރުލްއާސާރު ހުޅުވައި މީހުންނަށް ވަދެވޭ ގޮތަށް ބެހެއްޓުމަށް މިހާރު ވަނީ ނިންމާފަ."

މިނިސްޓަރު ހީނާ

މީގެ އިތުރުން، ރަސްމީ ދުވަސްތަކުގައި ވެސް ދާރުލްއާސާރު ހުޅުވާފައި ހުންނަ ވަޤުތު އިތުރުކުރުމަށް ބައެއް ފަރާތްތަކުން އެދެމުން އަންނަކަމަށް މިނިސްޓަރު ވިދާޅުވިއެވެ.

އެހެންްކަމުން ރަސްމީ ދުވަސްތަކުގައިވެސް އެތަން ހުޅުވާފައި ހުންނަ ވަޤުތު ހެނދުނު 09:00 އިން ރޭގަނޑު 21:00 ނުވަތަ 22:00 އަށް އިތުރުކުރުމަށް ވިސްނަވަމުންދާ ކަމަށް މިނިސްޓަރު ވިދާޅުވިއެވެ.

އަދި އެކަަމަށްޓަކައި އިދާރީ ގޮތުން ގެންނަންޖެހޭ ބަދަލުތައް ގެނައުމުގެ މަސައްކަތް މިހާރު ކުރިއަށްދާކަމަށްވެސް މިނިސްޓަރު ވިދާޅުވިއެވެ.