ބޭރުގެ ބައެއް ވެބްސައިޓުތަކުން ވިޔަފާރިކުރެވޭ މިންވަރު ލިމިޓު ކުރަން ނިންމާފައިވާ ކަމަށް ބޭންކް އޮފް މޯލްޑިވްސް (ބީއެމްއެލް)ގެ ސީއީއޯ މުޙައްމަދު ޝަރީފް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ސީއީއޯ މުޙައްމަދު ޝަރީފް ވިދާޅުވީ ބޭންކަށް ގަންނަން ލިބޭ ބޭރު ފައިސާއިން ގިނަ ރައްޔިތުންގެ ބޭނުންތަކަށް ވިއްކުމުގެ ބޭނުމުގައި ކުރިން މިފަދަ މަދު ސައިޓްތަކުން ވިޔަފާރީ ކުރުމަށް ޖުމްލަ ބޭންކުން ވިއްކޭ އަދަދު ކޮންމެ ދުވަހަކަށް ކަނޑައެޅޭ ބަޖެޓެއްގެ ތެރެއިން ވިއްކުމަށް ނިންމާފައިވާ ކަމަށެވެ.
މިހާރު ބޭނުންވަނީ ސައިޓްތަކަށް އިތުރުވެގެން ދާ ވަރު ކޮންޓްރޯލް ކުރުން ކަމަށް ސީއީއޯ ވިދާޅުވި އެވެ. ކޮންޓްރޯލް ނުކުރެވިއްޖެނަމަ ދެން އަޅަން ޖެހޭ ފިޔަވަޅު ތަކަކުން އެހެން ރައްޔިއްތުންނަށް ވެސް ދަތި ކަމެއް ލިބިދާނެކަމަށާއި އެހެންކަމުން މި ފިޔަވަޅަކީ އާންމު ޒަރޫރީ ބޭނުން ތަކަށް ގިނަ ރައްޔިތުންނަށް ހަމަހަމަކަމާއެކު ބޭންކުންދޭ ބޭރު ފައިސާ ހިދުމަތް ފޯރުކޮށް ދިނުމުގެ ބޭނުމުގައި ކުރާ ކަމެއް ކަމަށް ޝަރީފް ވަނީ ފާހަގަކުރައްވާފައެވެ.
އީކޮމާސްގައި މަހަކު 30 ޓްރާންސެކްޝަނަށް ވުރެ އިތުރަށް ބޭނުންކުރަނީ ކަސްޓަމަރުންގެ 3 އިންސައްތަ އަށް ވުރެ ވެސް މަދުން މީހެއްކަން ޝަރީފް ވަނީ ފާހަގަކުރައްވާފައެވެ.
ޝަރީފް ވިދާޅުވީ މިހާރު ގިނަ ކްރެޑިޓް ކާޑު ގެންގުޅުނު ނަމަވެސް އެ ކަސްޓަމަރަށް ލިބެނީ ބޭރު ފައިސާގެ ޓްރާންސެކްޝަންތައް ހެދުމަށް ހުރިހާ ކާޑަކަށް ޖުމްލަ އަދަދެއް ކަމަށާއި އެހެންވެ ގިނަ ކްރެޑިޓް ކާޑު ގެންގުޅުނު ނަމަވެސް އަހަރީ ފީ، އެންމެ ކާޑަކުން ނަގާ ގޮތަށް ނިންމާފައިވާ ކަމަށެވެ.