ރަސްމާލެ މަޝްރޫއާއި ނުލާ ބޯހިޔާ ވަހިކަން ހޯދާނެ ގޮތެއް ނެތް ކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޢަބްދުﷲ މުއްޠަލިބް ވިދާޅުވެއްޖެއެވެ.

މިއަދު ރައްޔިތުންގެ މަޖިލީހަށް ވަޑައިގެން މެންބަރަކު ކުރި ސުވާލަށް ޖަވާބުދެއްވަމުން ޑރ. މުއްތަލިބް ވިދާޅުވީ ރަސްމާލެ މަޝްރޫއަކީ ކުރިއަށް އޮތް 20 އަހަރަށް ޕްލޭންކޮށްގެން ހިނގާ މަޝްރޫއެއް ކަމަށާއި އެ މަޝްރޫއާއި އެހެން މަޝްރޫތަކާއި އެއްވެސް ގުޅުމެއް ނެތް ކަމަށެވެ.

މިދިޔަ ސަރުކާރުގައި ހުޅުމާލެ 2 ގައި ހުރިހާ ބިންތައް ވެސް، ފޭސް 3 ހިއްކާފަ އެތަނުގައި ހުރި ހުރިހާ ބިންތަކެއްވެސް، ގުޅީފަޅުގައި ޕޯޓު އަޅަން އޮތް ތަން ފިޔަވާ ދެން ބާކީ އޮތް ހުރިހާ ތަނެއްވެސް، ގިރާވަރުގެ ހުރިހާ ތަނެއް ވެސް، ގިރާވަރުގެ 169 ހެކްޓަރުގެ ތެރޭގައި 5000 ގޯތި ނެގޭނެ ގޮތެއް ނުވިސްނޭ. އެ ކަމުވެސް އެ ވަރަށް ގޯތި ދީފަ އޮތީ

ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޢަބްދުﷲ މުއްޠަލިބް

އެހެންކަމުން މިހާރު މާލެ ސަރަހައްދުގައި ރައްޔިތުނަށް ބޭނުންވާ ފްލެޓް އެޅުމަށްޓަކައި ބިމެއް ނެތް ކަމަށް ވަޒީރު ވިދާޅުވިއެވެ.

މާލެ، ގްރޭޓާ މާލެ މިކިޔާ ސަރަހައްދުގައި ހުރި ހުރިހާ ތަނެއް އެއްކޮށްލައިގެން ވެސް އަޅުގަނޑުމެންނަށް އެންމެ ގިނަ އަދަދަކަށްވެސް ފްލެޓް އެޅޭނެ ކަމަށް މި ބެލެވެނީ ގާތްގަނޑަކަށް 12،000 ފެލެޓް

ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޢަބްދުﷲ މުއްޠަލިބް

ވަޒީރު ވިދާޅުވީ، މިހާރު ހިއްކަމުން ދާ ބިންތައް ރައްޔިތުންނަށް ގޯތި ބަހާފަ ހުރުމުން ރައްޔިތުންނަށް މި އޮތް ބޯހިޔާ ވަހި ކަމުގެ ދަތިކަން ހައްލުކުރުމަށްޓަކައި ކޮންމެވެސް އެހެން ގޮތެއް ވެސް ހޯދަންޖެހޭ ކަމަށެވެ. އަދި މުސްތަގްބަލަށް ވިސްނާގެން ޕްލޭން ވެސް ކުރަނޖެހޭ ކަމަށް ވަޒީރު ފާހަގަކުރެއްވިއެވެ.