ބޮޑުތަކުރުފާނު މަގު ތަރައްގީ ކުރުމުގެ 47 އިންސައްތަ މަސައްކަތް ނިމިއްޖެ ކަމަށް މޯލްޑިވްސް ޓްރާންސްޕޯޓިންގ އެންޑް ކޮންޓްރެކްޓިން ކޮމްޕެނީ، (އެމްޓިސީސީ)ން ބުނެފިއެވެ.
އެމްޓިސިސީން މީސްމީޑިއާގައި އާންމުކޮށްފައިވާ ޕޯސްޓެއްގައި ބުނީ މިހާރު އެ މަޝްރޫގެ 5 ވަނަ ފިޔަވެހީގެ ދަށުން ގިނަ ކަންތައްތަކެއް ހާސިލްކޮށްފައިވާކަމެއް ކަމަށެވެ.
އެގޮތުން ހާސިލް ކޮށްފައިވާ ކަންތައްތަކަށް ބަލާލާއިރު، ފެން ލިބޭނެ ނިޒާމް ގާއިމްކުރުން، ފެން ހިންދާ ނިޒާމު ގާއިމްކުރުން، އަދި ސެޓްލްމަންޓް ޓޭންކްތައް އިންސްޓޯލް ކުރުމުގެ މަސައްކަތް ވެސް ވަނީ ނިންމާފައެވެ.
މީގެ އިތުރުން ނަރުދަމާ ނިޒާމު އިތުރަށް ކުރިއެރުވުމާއި، ޕޭވްމެންޓު ޖެހުމާއި، ކޭބަލް ޖަންކްޝަންގެ މަސައްކަތްތަކާއި، ވާރޭފެން ހިންދާ ނިޒާމު ގާއިމްކުރުން މި ހަފްތާގެ ތެރޭގައި ނިމޭނެ ކަމަށް އެމްޓީސީސީން ބުނެއެވެ.
އެމްޓީސީސީން ބުނީ އަންނަ ހަފްތާގައި ކުރިއަށް އޮތް މަސައްކަތްތަކުގެ ތެރޭގައި ސަބް ބޭސް ތައްޔާރުކުރުމާއި، އޭބީސީ އެޅުމާއި، ކޯރު އެޅުމުގެ މަސައްކަތް ފެށުން ހިމެނޭ ކަމަށެވެ.
ހަމަމިއާއެކު 2 ވަނަ، 3 ވަނަ، އަދި 4 ސެގްމަންޓްގައި ޝީޓް ޕައިލިންގެ މަސައްކަތްތައް ރަނގަޅަށް ކުރިއަށްދާއިރު، މިހާތަނަށް ޖުމްލަ 243 މީޓަރުގެ މަސައްކަތް ނުވަތަ 47 އިންސައްތަ ނިމިފައިވާ ކަމަށް އެމްޓީސީސީން ބުނެއެވެ.
މަގު ހެދުމުގެ މުޅި މަޝްރޫއުގެ ތެރެއިން ޖުމްލަ 803 މީޓަރުގެ ސަރަހައްދެއް ޝީޓްޕައިލް ކުރުމަށް ވަނީ ހަމަޖައްސާފަ އެވެ.
މި މަޝްރޫއުގެ ދަށުން އެމްޓީސީސީން އަމާޒުހިފާފައި ވަނީ މި މަހުގެ ނިޔަލަށް ބާސެލޯއިން ފަށައިގެން އެފްއެސްއެމް ބިލްޑިންއާ ހަމައަށް މަސައްކަތް ނިންމުމަށެވެ.
ބޮޑުތަކުރުފާނު މަގު ޒަމާނީ ފެންވަރަށް ތަރައްގީ ކުރުމުގެ ތިންވަނަ ފިޔަވަހީގެ މަސައްކަތް ކުރިއަށްދަނީ، އިއްޒުއްދީނު ފާލަމުން ފެށިގެން ހެންވޭރު ފެރީ ޓާމިނަލާ ހަމައަށް 700 މީޓަރުގެ ސަރަހައްދެއްގައެވެ. އަދި އެއީ އެ މަޝްރޫއުގެ ފޭސް 1ގެ ސެގްމަންޓް 2 އިން 5އާ ހަމައަށް އޮންނަ ސަރަހައްދެވެ.