ކުރީގެ ރައީސް އަބްދުﷲ ޔާމީން، އުޅުއްވަނީ މާފުށްޓަށް ވަޑައިގަންނަވާ ހިތުން ކަމަށް ރައްޔިތުންގެ މަޖިލިހުގެ އިނގުރައިދޫ ދާއިރާގެ މެމްބަރު އަދި ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހިމް ފަލާހް ވިދާޅުވެއްޖެއެވެ.
ފަލާހް މިހެން ވިދާޅުވީ ނިމިދިޔަ ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ހއ. މުރައިދޫން ޕީއެންސީއަށް ލިބުނު ކާމިޔާބު ފާހަގަ ކުރަން އެ ޕާޓީގެ ހަރުގޭގައި ބޭއްވި ޖަލްސާގައިވާހަކަ ދައްކަވަމުންނެވެ.
މުރައިދޫ ކައުންސިލްގެ ތިން ގޮނޑި އާއި އަންހެނުންގެ ކޮމިޓީގެ ތިން ގޮނޑީގެ ތެރެއިން ދެ ގޮނޑި ނެގީ ވެސް ޕީއެންސީންނެވެ.
ރޭގެ ޖަލްސާގައި ފަލާހް ވަނީ އެމްޑީޕީ ވެރިކަމުގައި އޮތް ނަމަ ރައީސް ޔާމީނަށް ގޭގައި އިންނެވުނީސްތޯ ސުވާލު ކުރައްވާފައެވެ.
އެގޮތުން ގޭގައި ތަށިމުށި ޖަހާ ތަނާއި ގޭގައި ފުޓްސަލް ދަނޑު ހަދާ ތަނާއި ގޭގައި މައިކް ހިފައިގެން ރީތި ވާހަކަ ކިއުއްވުމަށް އިންނެވުނީސްތޯ ފަލާހް ވަނީ ސުވާލު ކުރައްވާފައެވެ.
ފަލާހު ވިދާޅުވީ ރައީސް މުޢިއްޒު ބޭނުންފުޅުވެ ލައްވާނަމަ ޤާނޫނު އަސާސީ އާއި ޤާނޫނުތަކަށް ބަދަލެއް ގެނެވޭނެ ސުޕަ މެޖޯރިޓީއެއް މަޖިލީހުގައި އޮންނާނެ ކަމަށާއި އެހެން ނަމަވެސް ރައީސް މުއިއްޒުއަކީ ރައްޔިތުންގެ ފައިދާއާއި ލާބައަށް ވިސްނަވާ ބޭފުޅެއް ކަމަށެވެ.
ހަމައެހެންމެ ރައީސް މުޢިއްޒު އަކީ ފަނޑިޔާރުންނަށް ނުފޫޒު ފޯރުވާނެ ބޭފުޅެއް ނޫންކަން ރައްޔިތުންނަށް މީހާރު ޔަޤީންވާނެ ކަމަށް ވެސް ފަލާހް ވިދާޅުވިއެވެ.