މި މަހުގެ 4 ވަނަ ދުވަހު ކުރިއަށް ދިއަ ލޯކަލް ކައުންސިލްތަކުގެ އިންތިޚާބާ، އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބުގެ އިތުރުން ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ޚިޔާލު ހޯދުމަށް ނެގުނު އިންތިޚާބު ތަކަކީ ރާއްޖޭގެ ތާރީޚުގައި ވެސް އެންމެ އިންތިޒާމު ދަށް، ރޭވުންތެރިކަމެއް ނެތް އިންތިޚާބު ކަމަށް އެމްޑީޕީ އިން ބުނެފި އެވެ.
މިކަންހާމަކުރައްވާފައި ވަނީ އިންތިޚާބުތަކާ ބެހޭ ގޮތުން އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ލޯކަލް ކައުންސިލް އިންތިޚާބަށް އެމްޑީޕީން ހަމަޖައްސާފައިވާ ތަރުޖަމާން ދިއްދޫ ދާއިރާގެ ރައީސް އަބްދުﷲ ވަހީދު އެވެ.
ވަހީދު ވިދާޅުވީ، މި އިންތިޚާބުގެ ކަންކަން ތަރުތީބުވެގެން އައި ގޮތާ މެދު ފުރަތަމަ ދުވަހުން ފެށިގެން ވެސް އެމްޑީޕީ އިން ދިޔައީ ކަންބޮޑުވުން ފާޅު ކުރަމުން ކަމަށާއި އެންމެ ބޮޑު ކަންބޮޑުވުމެއްގެ ގޮތުގައި ފާހަގަވީ އިލެކްޝަންސް ކޮމިޝަން (އީސީ) ގެ އަމަލުތައް ކަމަށެވެ.
އެގޮތުން އީސީން ސަރުކާރަށް ތަބާވެ މި އިންތިޚާބުގައި ގިނަ ރައްޔިތުންނަށް ވޯޓު ނުލެވޭނެ ގޮތަށް އިންތިޒާމުތައް ރޭވި ކަމަށާއި ޚާއްޞަކޮށް، ރާއްޖެއިން ބޭރުގައި ފޮށިތައް ނުބަހައްޓަން ނިންމުމާއެކު އެމްޑީޕީން ދިޔައީ އެ ކަންބޮޑުވުން ފާޅުކުރަމުން ކަމަށް ވަހީދު ވިދާޅުވިއެވެ.
ވަހީދު ވިދާޅުވީ އިންތިޚާބަށް 24 ގަޑިއިރަށް ފެވައި ވަނިކޮށް އިލެކްޝަންސް ކޮމިޝަންގެ ރައީސް ވަނީ ވޯޓުގެ ސިއްރުކަން ގެއްލޭ ގޮތަށް އަމަލުކުރައްވައި ވޯޓުލާން ތިބި މީހުންނަށް ވޯޓު ނުލުމަށް ހިތްވަރު ލިބޭ ގޮތަށް ވާހަކަ ދައްކަވާފައި ކަމަށެވެ.
މިކަމުން ސާފުވީ އެ ކޮމިޝަންގެ ރައީސް މުހައްމަދު ޒާހިދު ހުންނެވީ ސަރުކާރުގެ ސީދާ ނުފޫޒާ ބާރުގެ ދަށުގައި ކަމަށާއި މި ސަރުކާރަށް މި އިންތިޚާބު ކަމިޔާބު ކޮށްދިނުމަށްޓަކައި އީސީގެ ރައީސްގެ ހައިސިއްޔަތުން ކުރެވުނު ހުރިހާ މަސައްކަތެއް ޒާހިދު ވަނީ ކުރައްވާފައި ކަމަށާއި މުޅި އިންތިޒާމުތައް ގަޑުބަޑު ކޮށްގެން އެ ބޭފުޅުން އަމަލުކުރަން މަސައްކަތް ކުރާ ކަމަށް ބުނެ ސީދާ އެ ކޮމިޝަންގެ ބޭފުޅުން މައުލޫމާތު ދެމުންދާ ކަމަށް ވެސް ވަހީދު ވަނީ ތުހުމަތު ކުރައްވާފައެވެ.
އެހެންކަމުން "އީސީގެ ރައީސަށް ދަންނަވަން އޮތީ މަގާމުގެ މަސްއޫލިއްޔަތު ގާނޫނުގަ އެ ބުނާ މުސްތައްގިލު މުއައްސަސާއެއްގެ ގޮތުގައި ހިންގޭނެ ކަމުގެ ފުރުސަތު ނުދެވޭނަމަ މަގާމުން ދުރަށް ޖެހިވަޑައިގަތުމަށް" ވަހީދު ވަނީ ވިދާޅުވެފައެވެ.