އަމާންކަން ގާއިމު ކުރުމަށް ސަރުކާރުގެ ޕާޓީއަށް ތާއިދުކުރަންޖެހޭ ކަމަަށް ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
"ހޭލުން" ޕްރޮގްރާމްގައި ވާހަކަފުޅު ދައްކަވަމުން ގާސިމް ވިދާޅުވީ ކުރިއެރުން ބޭނުންވަންޔާ ސަރުކާރު ހިނގާ ޕާޓީގެ ކެންޑިޑޭޓުންނަށް ކައުންސިލް އިންތިހާބުގައި ތާއީދުކުރަންޖެހޭ ކަމަށެވެ.
ގާސިމް ވިދާޅުވީ އެނޫން ގޮތަކަށް ކާމިޔާބު ނުލިބޭނެ ކަމަށެވެ.
ގާސިމް ވިދާޅުވީ މާލޭސިޓީ ކައުންސިލަށް މޫސާ އަލީ ޖަލީލް ނުހޮވައިފިއްޔާ މާލެ އަށް ގެނެވޭނެ މާ ބޮޑު ރަނގަޅުތަކެއް ނޯންނާނެ ކަމަށެވެ.
އަމާން ކަމާއި އޮމާން ކަން އަދި ހިތްހަމަޖެހުންވެސް ހުރިހާ ކަމަކާއެކީގައި ބޭނުންވަކަމަށްވެސް ގާސިމް ވަނީ ވިދާޅުވެފައެވެ.
މީގެ އިތުރުން ގާސިމް ވަނީ އެކްގައި ކުރެއްވި ޕޯސްޓެއްގައި މާލެ ސިޓީގެ މޭޔަރުކަމަށް މޫސާ ޖަލީލު އެންޑޯޒްކޮށް، ތާއީދުކޮށްފައިވާ ކަަމަށް ވިދާޅުވެފައެވެ.
ގާސިމް ވިދާޅުވީ ހަމައެކަނި 1988 ވަނަ އަހަރު ނޮވެންބަރު މަހު ތިން ވަނަ ދުވަހު ދިވެހި ގައުމަށް ކުރިމަތިވި އުދުވާނީ ހަމަލައިން ގައުމު ސަލާމަތްކުރެއްވުމަށް، މޭ އައްޑަނައެއްގެ ގޮތުގައި ހައްދަވައިގެން ދުޝްމަނުންގެ ކުރިމައްޗަށް ހިތްވަރާއި އީމާންތެރިކަމާއެކު ނުކުންނެވުމުންވެސް އެމަނިކުފާނުގެ ގަދަފަދަ ގައުމީ އަޒުމު ސާބިތުކޮށްދޭ ކަމަށެވެ.
އެއިރުއްސުރެ މިއަދާ ހަމަޔަށްވެސް އެމަނިކުފާނު ހުންނެވީ އަބަދުވެސް ގައުމަށްޓަކައި ތައްޔާރަށްކަމަށާއި ކޮންމެ ސަރުކާރަކުން މަތިކުރެއްވި ކޮންމެ ވަޒީފާއެއްގެ ވާޖިބުވެސް އަދާކުރެއްވީ ތެދުވެރިކަމާއެކުކަމަށް ގާސިމް ވިދާޅުވިއެވެ. ފަސްބައިގާ ކިލަނބުކަމެއް ނެތްކަމަށާއި އެއްވެސް މީހަކާމެދު ކުޑައިމީސްކޮށް ކުރެއްވި ކަމެއް ނެތްކަމަށް ގާސިމް ވިދާޅުވިއެވެ.
ގާސިމް ވިދާޅުވީ މޫސާ އަލީ ޖަލީލް އަކީ ހުލްގު ހެޔޮ، އެންމެންގެ ލޯބި ލިބިވަޑައިގެންފައިވާ ތަޖްރިބާކާރު ޝަހްސިއްޔަތެއްކަމަށެވެ.