މިނިސްޓަރު މިހެން ވިދާޅުވީ ބީއެމްއެލް މެދުވެރިވެގެން ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) އާ ހަވާލުކޮށްގެން ވިލިމާލޭގައި ހަދާ 300 ހައުސިން ޔުނިޓްގެ ބިންގާ އެޅުމުގެ ރަސްމިއްޔާތުގައި ވާހަކަދައްކަވަމުންނެވެ.
އެ ރަސްމިއްޔާތުގައި ވާހަކަދައްކަވަމުން މިނިސްޓަރު ޑރ. އަބްދުﷲ މުއްޠަލިބު ވިދާޅުވީ ރައްޔިތުންގެ އޮތް އެންމެ ބޮޑު ޝަކުވާއަކީ އާއިލާތައް ބޮޑުވެގެންދާއިރު ބޯހިޔާވަހިކަން ދަތިކަން ކަމަށެވެ.
މި މަހުގެ 10 ވަނަ ދުވަހު ރައީސް ޑރ. މުހައްމަދު މުޢިއްޒު ވިލިމާލޭގެ ބައެއް ގޭގެއަށް ކުރެއްވި ޒިޔާރާތުގައި ބައިވެރިވެވަޑައިގެންނެވި ކަމަށެވެ. މިގޮތުން އެ ޒިޔާރަތުން ފާހަގަވި ކަންތަކުގެ ތެރޭގައި ރައްޔިތުންގެ އޮތް އެންމެ ބޮޑު ޝަކުވާއަކީ އާއިލާތައް ބޮޑުވެގެންދާއިރު ބޯހިޔާވަހިކަން ނެތުން ކަމަށް މިނިސްޓަރު ވިދާޅުވިއެވެ.
އެ ރަސްމިއްޔާތުގައި ވާހަކަދައްކަވަމުން މިނިސްޓަރު ވަނީ ޗައިނާގެ ހިލޭ އެހީގައި ވިލިމާލޭގައި މަގު ހެދުމުގެ މަސައްކަތްތަކެއް ވެސް ކުރަމުން އަންނަ ކަމަށާއި އެއާ އެކު އެ ރަށުގެ ފެނާއި ނަރުދަމާ އަދި ކަރަންޓު ވިއުގަ އަޕްގްރޭޑް ކުރެވޭނެ ކަމަށް ވިދާޅުވެފައެވެ.
މުއްޠަލިބު ވިދާޅުވީ ދަރިވަރުން އޭލެވެލް ކިޔެވުމަށް ދާންޖެހެނީ މާލެ ނުވަތަ ހުޅުމާލެއަށް ކަމަށާއި ސިއްހީ ފަރުވާ ހޯދަންވެސް ދަތުރުކުރަންޖެހެނީ މާލެއަށް ކަމަށާއި ކާންބޯން މަސައްކަތްކުރުމަށް ވެސް ދާންޖެހެނީ މާލެއަށް ކަމަށް މިނިސްޓަރު ވިދާޅުވިއެވެ
މީގެ އިތުރުން މިނިސްޓަރު ވިދާޅުވީ މި ފަސް އަހަރުގެ ދައުރު ނިމޭއިރު މާލެ އާއި ހުޅުމާލެއެކޭ އެއްފަދައިން ވިލިމާލެ ވެގެންދާނީ ފުރުސަތުތައް ތަނަވެސްވެފައި އޮތް ރަށަކަށް ކަމަށެވެ. އެގޮތުން ވަޒީފާ އާއި ތައުލީމީ ފުރުސަތުތަކާއި ރަނގަޅު ފެންވަރުގެ ސިއްހީ ނިޒާމަކާއި ދިރިއުޅުމުގެ ގިނަކަންކަން ހަމަޖެހިފައިވާ ތަނަކަށް ކަމަށް މިނިސްޓަރު ވިދާޅުވިއެވެ.