ބީއެމްއެލް އެފޯޑަބަލް ހައުސިން މަޝްރޫޢުގެ ދަށުން ބޯހިޔާވަހިކަން ގަނެވޭނީ އަމިއްލަ ބޯހިޔާވަހިކަމެއް ނެތް އަދި އެމީހުންނަކީ "އާއިލީ ބޯހިޔާވަހިކަން" ޕްރޮގްރާމަށް ޝަރުތުހަމަވާ މީހުންނަށް ކަމަށް ހައުސިން މިނިސްޓަރު ޑރ. އަބްދުﷲ މުއްޠަލިބު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ބީއެމްއެލް އިން ހުޅުމާލޭގައި އަޅާ 1،224 އެފޯޑަބަލް ހައުސިން ޔުނިޓްގެ އަމަލީ މަސައްކަތް ފެށުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުންނެވެ.
އެ ރަސްމިއްޔާތުގައި ވާހަކަދައްކަވަމުން މިނިސްޓަރު މުއްތަލިބު ވިދާޅުވީ ހެޔޮ އަގުގައި ބޯހިޔާވަހިކަން ގަންނަން ލިބޭނެ މަޝްރޫއުއެއް ފެށުމަށް މިހާރު އިއުލާނުކޮށްފައި ވާކަމަށެވެ.
އަދި އެއީ އާއިލީ ބޯހިޔާވަހިކަަމަށް ޝަރުތު ހަމަވާ އެކަމަކު ބޯހިޔާވަހިކަމެއް ނެތް މީހުންނަށް ހިންގާ މަޝްރޫއުއެއް ކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު ވިދާޅުވީ، ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢުތަކަކީ ދަތި ހާލަތުގައި ދިރިއުޅޭ، ބޯހިޔާވަހިކަމަށް ބޭނުންޖެހިފައިވާ މީހުންނަށް ރައްކާތެރިކަން ފޯރުކޮށްދިނުމަށް ބައްޓަން ކުރާ މަޝްރޫޢުއެއް ކަމަށެވެ.
ބީއެމްއެލްއަކީ ސަރުކާރުގެ މަސައްކަތުގައި އެންމެ ބޮޑު އެހީތެރިކަމެއް ލިބޭ އެއް ބައިވެރިޔާ ކަން ފާހަގަކުރައްވާ މިއީ، ދަޢުލަތުގެ މުވައްސަސާތަކުގެ އެއްބާރުލުމާއެކު ގުޅިގެން ހޯދިފައިވާ އިޖާދީ ޙައްލުތަކެއް ކަމަށް މިނިސްޓަރު ވިދާޅުވިއެވެ.
އަދި މި ޔުނިޓުތައް ދޫކުރާނީ، ސަރުކާރުގެ އާއިލީ ބޯހިޔާވަހިކަމުގެ ސިޔާސަތުގެ ދަށުން ކަމަށް މިނިސްޓަރު ވިދާޅުވިއެވެ.
އެމްއެމްއޭގެ ޤަވާއިދުތަކުގެ ތެރެއިން، ރާއްޖޭގެ ބޭންކުތަކުން ވަކި އިންސައްތައެއް ބޯޔާވަހިކަމުގެ މަސައްކަތްތަކަށް ކަނޑައަޅާ ގެންދެވޭ ގޮތަށް ވަނީ ބަދަލުކޮށްފައެވެ.
އާއިލީ ބޯހިޔާވަހިކަން ޕްރޮގްރާމުގެ ދަށުން ފްލެޓާއި ގޯއްޗަށް ކުރިމަތިލުމުގެ އަސާސީ ޝަރުތަކީ މާލޭގައި ދިރިއުޅޭތާ 15 ވުމާއި މާލޭ ރަށްވެހިންނަށް ވުމެވެ.
ބީއެމްއެލްއާ ހަވާލުކޮށްފައިވާ އަގުހެޔޮކޮށް އަޅާ ފްލެޓުތައް ނިންމަން މުއްދަތު ދީފައި ވަނީ 2028 ގެ މެދުތެރެ އަށެވެ.