ރިފެރެންޑަމް ވޯޓާ ބެހޭ ގޮތުން އިލެކްޝަން ކޮމިޝަން އީސީ އިން އަނގައިންވެސް ބުނެފައި ނުވާކަމަށް ހުޅުމާލޭ ދާއިރާގެ ކުރީގެ މެމްބަރު އަލީ ނިޔާޒް ވިދާޅުވެއްޖެއެވެ.
އެމްޑީޕީއިން އިލެކްޝަން ކޮމިޝަނާ ބައްދަލު ކުރުމުގެ ކުރިން މީޑިއާތަކަށް މައުލޫމާތުދެއްވަމުން ނިޔާޒު ވިދާޅުވީ އީސީ އިން ރިފެރެންޑަމް ވޯޓާ ބެހޭ ގޮތުން އެއްވެސް މައުލޫމާތެއްދީފައި ނުވާކަމަށެވެ. އަދި އެކަމާމެދު އޭނާ ވަނީ ކަންބޮޑުވުން ފާޅުކުރައްވާފައެވެ.
ނިޔާޒް އިތުރަށް ވިދާޅުވީ ކުރިއަށް މިއޮތް ކައުންސިލް އިންތިހާބަކީ އެންމެ މަދުން މީހުން ވޯޓު ލާނެ އިންތިހާބަށް ހެދުމަށްޓަކައި އީސީ އިން މަސައްކަތްކުރަމުން އަންނަކަން ފާހަގަވެފައިވާކަމަށެވެ.
އިއްޔެ ދާއިމީ ލިސްޓު އިއުލާނު ކޮށްފައި ވާކަން ފާހަގަކުރައްވާ ނިޔާޒް ވިދާޅުވީ މައުލޫމާތު ދިނުމަކީ ލިސްޓު އާންމުކުރުމުގެ ކުރިން ކުރަންޖެހޭ ކަމެއް ކަމަށެވެ. އަދި މި ކަންތައްތަކަށް ބެލުމަށް ފަހު އަދިވެސް ފުރުސަތު އޮންނާނެ ކަމަށް އުންމީދު ކުރައްވާކަމަށް ނިޔާޒު ވިދާޅުވިއެވެ.
ނިޔާޒު އިތުރަށް ވިދާޅުވީ ގާނުނަށް ބަދަލު ގެނެސްގެން ވިޔަސް ވީހާވެސް ގިނަ ރައްޔިތުންނަށް ވޯޓު ލުމުގެ ފުރުސަތު ތަނަވަސް ކޮށްދިނުމަށް އެދޭކަމަށެވެ.
އެމްޑީޕީ އިން އީސީ އަށް ބައްދަލު ކުރުމުގެ ބޭނުމަކީ ޝަކުވާތަށް ހުށަހަޅައި، ހައްލު ހޯދައި އެކަން ކަމަށް ބާރުއެޅުމަށް ޓަކައި ކަމަށް ނިޔާޒު ވިދާޅުވިއެވެ.