ބޭހުގެ ކަންކަމާ ބެހޭ ހާއްސަ ކުންފުޏެއް އުަފައްދާ މިހާރު އެ ކުންފުނީގެ މަސައްކަތްތައް ފަށާފައިވާކަމަށް ސިއްހީ ވަޒީރު އަބްދުﷲ ނާޒިމް އިބްރާހީމް ވިދާޅުވެއްޖެއެވެ.
ދައުލަތުގެ މީޑިއާގައި ވާހަކަ ދައްކަވަމުން ނާޒިމް ވިދާޅުވީ ރަށް ރަށަށް ބޭސް ފޯރުކޮށްދިނުމުގައި ހާއްސަ އިސް ކަމެއް ދިނުމަށް ބޭހުގެ ކަންކަމާ ބެހޭ ހާއްސަ ކުންފުޏެއް އުަފައްދާފައި ވާކަމަށާއި އެ ކުންފުނިން ރާއްޖެއަށް ބޭސް އެތެރެ ކުރަން ފަށާފައިވާކަމަށެވެ.
އެ ކުންފުނިން ވަރަށް އަވަހަށް ކުންފުނީގެ ޑިވަލޮޕްމެންޓްސް އާއި ބެހޭ އިތުރު މައުލޫމާތު ހާމަކުރާނެ ކަން ފާހަގަކޮށް ނާޒިމް ވިދާޅުވީ އެމަނިކުފާނު ވަރަށް ގާތުން އެކުންފުނީގެ މަސައްކަތްތަށް ބަލަމުންދާކަމަށެވެ.
މީގެ އިތުރުން ނާޒިމް ވިދާޅުވީ ހާއްސަ ކުންފުޏެއް ހެދުުމުން ބޭސް ލިބުމުގައި ދިމާވާ މައްސަލަތައް ހައްލުވެގެންދާނެ ކަމަށެވެ.
މީގެ އިތުރުން ބޭހަކީ އަސާސީ ހިދުމަތެއްކަން ފާހަގަކުރައްވާ ނާޒިމް ވިދާޅުވީ ހިދުމަތް ރަނގަޅުކުރުމަށް ހާއްސަ ކުންފުޏެއް މުހިއްމު ކަމަށް ދެކިވަޑައިގަންނަވާކަމަށެވެ.
ނާޒިމް ވިދާޅުވީ އެކަމުގެ ލުއިތައް މިހާރުވެސް ފެންނަން ފަށާފައިވާކަމަށެވެ.