އައްޑޫ ސިޓީ ކައުންސިލްގައި އޮތް އެމްޑީޕީގެ ރަސްކަން މިފަހަރު ނިމުމަކަށް އަންނާނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމް ވިދާޅުވެއްޖެއެވެ.
ޕީއެންސީގެ އައްޑޫ ސިޓީ މާލޭ ސަރަހައްދުގެ ޖަގަހަ ހުޅުވުމަށް ބޭއްވި ޖަލްސާގައި ވާހަކަދައްކަމުން ޝިޔާމް ވިދާޅުވީ އެމްޑީޕީގެ ކައުންސިލަރުން ދައުރު ނިމެން ކައިރިވުމުން ކަރަންޓު ކެނޑޭ ވާހަކަ އާއި މަގުތަކުގެ ވާހަކަ ދެއްކުމަކީ އަޖައިބެއް ކަމަށާއި އައްޑޫ ކައުންސިލްގައި އޮތް އެމްޑީޕީގެ ރަސްކަން މިފަހަރު ނިމުމަކަށް އަންނާނެ ކަމަށެވެ.
އައްޑޫ ކައުންސިލްގެ މޭޔަރާއެކު މެޖޯރިޓީ އޮތީ އެމްޑީޕީއަށް ކަން ފާހަގަކުރައްވާ ޝިޔާމް ވިދާޅުވީ އެ މެޖޯރިޓީއާއެކު އައްޑޫ ރައްޔިތުންނަށް އެއްވެސް ކަމެއް ކޮށްދެވިފައި ނުވާ ކަމަށެވެ.
ޝިޔާމް ވިދާޅުވީ މުޅި ރާއްޖޭގެ ތަރައްގީއަށް ރައީސް ޑރ. މުހައްމަދު މުއިއްޒުގެ ތަސައްވުރެއް އެބައޮތް ކަމަށާއި އޭގެތެރެއިން އެންމެ ބޮޑު އެއް އިސްކަމެއް ދީފައި އޮތް ސިޓީއަކީ އައްޑޫ ކަމަށެވެ. އަދި އައްޑޫ ކައުންސިލްގެ މެޖޯރިޓީ މިފަހަރު ޕީއެންސީއަށް ދީފިނަމަ ތަފާތު ފެންނާނެ ކަމަށްވެސް ޝިޔާމް ވިދާޅުވި އެވެ.