ރަމަޟާންމަހަކީ ދީލަތިކަމާއި، ހޭދަކުރުމުގެ މައްސަރު ކަމަށް މިއަދުގެ ހުކުރު ހުތުބާގައި ބުނެފިއެވެ.
މިއަދުގެ ހުކުރު ހުތުބާގައި ބުނީ ފަހު ދިހައިގެ ދުވަސްތަކުގައި ހޭދަކުރުމާއި ސަދަގާތްކުރުން ގިނަކުރަން ޖެހޭކަމަށެވެ.
އެގޮތުން މުސްލިމުންގެ މައްޗަށް ފަރުޟުކުރައްވައިފައިވާ ފިތުރު ޒަކާތް ނެރުމަށް ސަމާލުކަންދީ އެ ކަމަށް އަވަސްވެގަތުމުގެ މުހިއްމުކަން ފާހަގަކޮށް، ފިތުރު ޒަކާތް ނެރުމަކީ ކޮންމެ މުސްލިމަކުމެ ކުރާންޖެހޭނޭ ކަމެއް ކަމަށް ހުތުބާގައި ބުނެފައިވެއެވެ.
ހުތުބާގައި ބުނީ މިއަދު އިސްލާމީ އުންމަތް ހޭދަކުރަމުން މިދަނީ އުންމަތުގެ ތާރީޚުގައި ފާހަގަކޮށްލެވޭ ފަދަ ނުރައްކާތެރި ދުވަސްތަކެއްގެ ތެރޭގައި ކަމަށެވެ.
އުންމަތުގެ މުސްތަގުބަލަށް ޓަކައި، އިސްލާމީ ހަޟާރަތު އަލުން އިއާދަކުރުމަށް އަދުގެ ޒުވާން ޖީލު އިހުލާސްތެރިކަމާ އެކު އަޒުމް ކަނޑައަޅާންޖެހޭ ކަމަށް ހުތުބާގައި ބުނެއެވެ.
ހުތުބާގައި އިތުރަށް ބުނީ ރަމަޟާން މަހަކީ ނަސްރާއި ފަތަހައިގެ މައްސަރެއް ކަމަށާއި ރަމަޟާން މަހަކީ ތަރުބަވީ މަދުރަސާއެއް ކަމަށެވެ.
މިއަދުގެ ހުކުރު ހުތުބާގެ މައުލޫއަކީ "ރަމަޟާންމަހުގެ ފަހު ދިހަ" އެއް ކަމަުން މިއަދުގެ ހުކުރު ހުތުބާގައި، އެންމެ ހެޔޮ ރޭތަކަކީ ރަމަޟާންމަހުގެ ފަހު ދިހައިގެ ރޭތައްކަމުގައި ލެއްވިކަމަށާއި، އޭގެ ތެރޭގައި އެއް ހާސް މައްސަރަށް ވުރެ ހެޔޮ ކަން ބޮޑު ލައިލަތުލްގަދުރި ލެއްވި ކަމަށް ބުނެފައިވެއެވެ.
ހުތުބާގައި ރަމަޟާންމަހަކީ ވިސްނުމާއި ފިކުރު ހެޔޮމަގަށް ގެންނާން އޮތް އެންމެ ހެޔޮ ވަގުތުކަން ފާހަގަކޮށް ވަނީ އަޒުމު ވަރުގަދަ ބަޔަކަށް ވަމުމަށް އިލްތިމާސްކޮށްފައެވެ.