ޖަލަށް އިތުރު 400 ގައިދީންގެ ޖާގަ މި ދެ އަހަތުގެތެރޭގައި އިރުކޮށް، ކުރީ ސަރުކާރުގައި މާލެ ޖަލު އުވާލި މައްސަލައިގައި ދޫވި މީހުން އަނބުރާ ޖަލަށް ގެނައުމުގެ މަސައްކަތް ކުރަމުންދާކަމަށް ދާހިލީ ސަލާމަތާ ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރީންގެ ބައްދަލްވުމުގައި ވާހަކަދައްކަވަމުން ވަޒީރު އިހުސާން ވިދާޅުވީ 450 މީހުން ގައިދުކުރުމުގެ ޖާގަ މުޅިން ގެއްލި، ގިނަ ގައިދީން ދޫކޮށްލާފަވައިރު، މިގޮތަށް ދޫވެފައި ތިބި މީހުން އަނބުރާ ޖަލަށް ގެނައުމުގެ ޖާގަ ހެދުމުގެ މަސައްކަތް ކުރަމުންދާކަމަށެވެ. އަދި އެކަމުގައި މިހާތަނަށް ބޮޑު ކާމިޔާބީއެއްވެސް ހޯދިފަވާކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ކުރިން ރަނގަޅަށް ހިނގަހިނގާހުރި މާލޭ ޖަލާއި، ކަސްޓޯޑިއަލް ފެސިލިޓީ، ނިމުނު ސަރުކާރުގައި މުޅިން އުވާލާފަވާކަން ފާހަގަކުރައްވާ ވަޒީރު ވިދާޅުވީ އޭރު ހުރި މާލޭ ޖަލަކީ ރާއްޖޭގައިވެސް އެންމެ ފެންވަރު ރަނގަޅުކޮށް ވަސީލަތްތައް ގާއިމުކޮށްފަވާ ޖަލުކަމަށެވެ.
ވަޒީރު ވިދާޅުވީ އެއީ 350 މީހުންގެ ޖާގަކަމަށެވެ. ނަމަވެސް އެއާއި އިންވެގެން ސްކޫލެއް އަޅާ، ޖަލު ބަންދުކޮށްފަވާއިރު، ޖަލުގައި ތިބި ގިނަ އަދަދެއްގެ މީހުން ދޫވެގެން ދިޔަކަމަށް ވަޒީރު ވިދާޅުވިއެވެ. އަދި 100 މީހުންގެ ޖާގައިގެ ކަސްޓޯޑިއަލް ޖަލު ތަޅާލާ، އެ ޖާގަވެސް މުޅިން ގެއްލުނީކަމަށް އިހުސާނު ވަނީ ވިދާޅުވެފައެވެ.
އޭރު ހުޅުމާލެ ޖަލުގައި 100 މީހުންގެ ޖާގަ ހެދުމަށް އަޅަން ފަށާފައި އޮތް އިމާރާތަކީވެސް، އަގު ބޮޑުކޮށް ހަވާލުކޮށްފައި އޮތް މަސައްކަތެއްކަމަށް އޭނާ ވިދާޅުވިއެވެ.
ޖަލުތަކުގެ ހިދުމަތް ހަރުދަނާކުރުމުގެ ގޮތުން ކުރިން އިދާރާއަށް ގޮސްގެން، އުނދަގުލުން ހޯދަމުން އައި ހިދުމަތްތައް މިހާރު ކޮންމެ ތާކު ހުރެގެންވެސް އޮންލައިންކޮށް ހޯދޭގޮތަށް ޕޯޓަލްއެއްގެ ހިދުމަތް ވަނީ ފަށާފައި ކަމަށާއި، ރާއްޖޭގެ އެންމެ ބޮޑު ޖަލު، މާފުށީ ޖަލުގެ ސެކިއުރިޓީ ހަރުދަނާކުރުމަށް، އެތަނުގައި ބޮޑީ ސްކޭނަރުވެސް މުޅިން އަލަށް ބަހައްޓާފައިވާ ކަމަށް އިހުސާން ވިދާޅުވިއެވެ.
މީގެ އިތުރުން، އަތޮޅުތަކުގައި ފުލުހުންގެ ހިދުމަތް ހަރުދަނާކުރުމުގެ މަސައްކަތުގެ ދަށުން، ޕޮލިސް ޕޯސްޓާއި ސްޓޭޝަން ހިމެނޭހެން 53 އިމާރާތެއްގެ މަސައްކަތްވެސް ކުރިއަށްގެންދަމުން ދާކަން ފާހަގަކުރައްވާ އިހުސާން ވިދާޅުވީ މި ސަރުކާރުން ފެށި 2 އިމާރާތެއްގެ މަސައްކަތް ނިންމާ މިހާތަނަށް ހިދުމަތަށް ގެނެސްވާއިރު، މިމަހުގެ ނިޔަލަށް އިތުރު 11 ތަނެއް ހިދުމަތަށް ގެނެވޭނެކަމަށެވެ.