މެދުއިރުމަތީގެ ހަނގުރާމައިގެ އަސަރު ރާއްޖެއަށް ކޮށްފައިވާ ކަމަށް ޓްރާސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
ރައީސް އޮފީހުގައި އޮތް ނޫސްވެރީންގެ ބައްދަލްވުމުގައި ވާހަކަދައްކަވަމުން މިނިސްޓަރު އަމީން ވަނީ ރާއްޖެއަށް މެދު އިރުމަތީގެ ހަނގުރާމައިގެ ސަބަބުން ކުރަމުން އަންނަ އަސަރުތަކަށް އަލިއަޅުވާލައްވާފައެވެ. އެގޮތުން މިއަދުގެ ހާލަތަށް ބަލާކަމުގައި ވާނަމަ މިއަދު ރާއްޖެއަށް އަންނަން ހަމަޖައްސާފައިވާ 53 ޝެޑިއުލް ފްލައިޓް އޮތް އިރު 18 ފްލައިޓެއް ކެންސެލްވެފައިވާކަމަ އަމީން ވިދާޅުވިއެވެ.
އަމީން ވިދާޅުވި ފްލައިޓްތައް ކެންސެލްވެފައިވަނީ ދުބާއީ، އަބޫދާބީ، ދޯހާ، ސާރުޖާލް، އަދި ބަހުރައިންގެ ތެރެއިން އަންނަން ހުރި ފްލައިޓްތައް ކަމަށެވެ. އަދި އޭގެ އަސަރުކޮށްފައިވާ ކަމަށް އޭނާ ވިދާޅުވިއެވެ.
މީގެ އިތުރުން ފްލައިޓްތައް ކެންސަލް ވުމުގެ ސަބަބުން ކުރިން ރާއްޖެއަށް ޒިޔާރަތްކޮށްފައި ތިބި ޓޫރިސްޓުންނަށް ވެސް އެމީހުންގެ ގައުމަށް އަނބުރާ ދިޔުމުގެ މައްސަލަތަކެއް އެބަހުރި ކަމަށް އަމީން ވިދާޅުވިއެވެ.
ރާއްޖެއަކީ މި ހާލަތުގެ ސެކަންޑަރީ އިފެކްޓްސް އަންނަ ގައުމެއްކަން ފާހަގަކުރައްވާ އަމީން ވިދާޅުވީ އެންމެ ބޮޑު ސެކަންޑަރީ އިފެކްޓްސްގެ ތެރެގައި ރާއްޖެ ހިމެނޭކަމަށެވެ. އަދި މިހާރު ކޮމާޝަލް ފްލައިޓުތައް އޮޕަރޭޓުކުރަން ފަށާފައިވާކަމަށް އޭނާ ވިދާޅުވިއެވެ.
އަމީން އިތުރަށް ވިދާޅުވީ ހާއްސަ ޓީމަކާއެކު އިތުރަށް ގެއްލުންތައް ލިބޭ ވަރު ކުޑަކުރުމަށް އަދި ޓޫރިސްޓު އެރައިވަލް ގިނަ ކުރުމަށް މެދު އިރުމަތި ހުރަސްކޮށް ސީދާ ޔޫރަޕުން މިދިޔަ ތިން ދުވަސްތެރޭގަ 5 ފްލައިޓެއް އޮޕަރޭޓް ކޮށްފިކަމަށެވެ. އަދި އެނޫންވެސް އެކި ގިނަ ގޮތްތަކަކަށް ފްލައިޓް ތަކުގެ އަދަދު މަތި ކުރަން މަސައްކަތް ކުރަމުން އަންނަ ކަމަށް އޭނާ ވިދާޅުވިއެވެ.