އިރާނުގެ މަނަވަރެއްކަމުގައިވާ އައިއިސް ޑެނާ ލަންކާގެ ދެކުނު އައްސޭރި ފަށުގައި އޮންނަ ގައްލޭ ކަނޑުގެ ސަރަހައްދާ ކައިރިޔަށް ފެތުމާއި ގުޅިގެން ލަންކާ ސިފައިން އެ ބޯޓުގައި ތިބި މީހުން ސަލާމަތްކޮށްފިއެވެ.
ޕެންޓަގަން އިން ބުދަ ދުވަހު ބޭއްވި ޕްރެސް ކޮންފަރެންސްގައި އެމެރިކާގެ ސަބްމެރިންއެއް ހަމަލާދީ އިރާނުގެ މަނަވަރެއް ފައްތާލާފައިވަކަމަށް އެމެރިކާގެ ޑިފެންސް ސެކެރެޓަރީ ޕީޓް ހެގްސެތް ވަނީ ބުނެފައެވެ. އޭގެފަހުން ލަންކާ ސަރުކާރުން ބުނެފައިވަނީ އެބޯޓުން އެކިވަރުގެ ޒަޚަމްތައް ލިބިފައިވާ 32 މީހުން ސަލާމަތްކޮށްފައިވާކަމަށާއި މަރުވެފައިވާ މީހުންގެ ހަށިތައްވެސް ފެނިފައިވާކަމަށެވެ. އަލްޖަޒީރާއިން ރިޕޯޓްކޮށްފައިވާ ގޮތުގައި ލަންކާގެ ދެކުނުގައި އޮންނަ ގައްލޭ ކަނޑާއި 40 ނޯޓިކަން މޭލު ދުރުން ޑިސްޓްރެސް ކޯލު ބުދަ ދުވަހުގެ ހެނދުނު 6 އާއި 7 އާ ދެމެދު ލިބިފައިވާކަމަށެވެ.
އެބޯޓުގައި 180 މީހުން ތިބިކަމަށް ލަންކާ އޮފިޝަލުން ބުނެއެވެ. މި ބޯޓަކީ މިދިޔަ މަހު އިންޑިއާގެ އައްސޭރިފަށުގައި އޮންނަ ސިޓީއެއް ކަމުގައިވާ ވިޝާކަޕަތްނަމް ގައި އޮތް ބައިނަލްއަގްވާމީ ފްލީޓް ރިވިއު ގައި ބައިވެރިވުމަށްފަހު އެނބުރި އިރާނަށްދާން ދަތުރުކުރަމުންދިޔަ މަނަވަރެކެވެ.
ލަންކާގެ ފޮރިން މިނިސްޓަރ ވިޖިތާ އެގައުމުގެ ގާނޫނު ހަދާ މަޖިލީހުގައި ވިދާޅުވީ ލަންކާގެ ނޭވީއަށް މަނަވަރު ނުރައްކަލެއްގައިވާ ކަމުގެ ސިގްނަލް ލިބުމާއި ގުޅިގެން ކަނޑުމަތީ ބޯޓުތަކާއި އެއަރފޯސް ބޯޓުތައް މަނަވަރު ކައިރިއަށް ފޮނުވިކަމަށެވެ. އަދި އެސަރަހައްދުގައި އިރު ބޯޓެއް އަދި އެއަރކްރާފްޓެއްވެސް ނެތްކަމަށް ލަންކާގެ ނޭވީގެ ސްޕޯކްސްޕާސަން ވިދާޅުވިއެވެ.
32 މީހަކު ސަލާމަތްކޮށްފައިވާއިރު ބާކީ ތިބި 150 ކްރޫން ވީތަނެއް ހޯދުމުގެ މަސައްކަތްކުރަމުން އަންނަކަމަށްވެސް ލަންކާގެ އޮފިޝަލުން މައުލޫމާތުދެއެވެ.
އަލްޖަޒީރާގެ ނޫސްވެރިޔާ ބުނާ ގޮތުގައި ލަންކާގައި ހުންނަ އިރާނުގެ އެމްބަސީގެ ދެ އޮފިޝަލުން ވަނީ ސަލާމަތްވި މީހުންނާ ވާހަކަދައްކާ ކަންހިނގާދިޔަ ގޮތް ހޯދުމުގެ މަސައްކަތްކޮށްފައެވެ.
އިރާނުގެ މަނަވަރެއް އެމެރިކާގެ ސަބްމެރިން އެއް ހަމަލާދީ ފައްތާލާފައިވާއިރު އެމެރިކާ އާއި އިސްރާއީލުން އިރާނަށް ދެމުންދާ ހަމަލާތަކުގައި މަރުވި މީހުންގެ އަދަދު ވަނީ 800ށް ވުރެ މައްޗަށް އަރާފައެވެ. އިރާނުން އަންނަނީ ބަދަލުގައި އިސްރާއީލަށާއި މެދުއިރުމަތީގައި ހުންނަ އެމެރިކާގެ އަސްކަރީ ބޭސްތަކަށާއި އެމެރިކާ އާ ގުޅުންހުރި އެކި ތަންތަނަށް ހަމަލާދެމުންނެވެ.