6 ރަށެއްގައި ގާއިމްކޮށްފައިވާ އައިސްޕްލާންޓްތައް އޮޕަރޭޝަނަށް ގެނެސްފައިވާކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމް ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ޝިޔާމް ވިދާޅުވީ ސަރުކާރުގެ އަމާޒަކީ މިހާރު ކުރިއަށްގެންދިޔުމަށް ނިންމާފައިވާ އައިސްޕްލާންޓްތަކުގެ މަސައްކަތް ނިންމާ މިއަހަރު އޮޕަރޭޝަނަށް ގެނައުންކަމަށެވެ. އަދި ސައުދީ ފަންޑުންނާއި ސަރުކާރުގެ ބަޖެޓުން ހަރަދުކޮށްގެން އައިސްޕްލާންޓް ތަރައްގީކުރުމަށް ނިންމާފައިވާކަމަށް އޭނާ ވިދާޅުވިއެވެ.
ވަޒީރު ވިދާޅުވީ މަސްވެރިންނަށް ދިމާވާ މައްސަލަތައް ހައްލުކުރުމަށްޓަކައި ކުރާ މަސައްކަތްތުގެ ތެރެއިން އައިސް ލިބުމުގެ ދަތިތައް ހައްލުކުރުމުގެ މަސައްކަތް ކުރަމުންދާކަމަށެވެ.
އެގޮތުން 6 ރަށެއްގައި ޤާއިމްކުރި އައިސްޕްލާންޓްތައް އޮޕަރޭޝަނަށް ގެނެސްފައިވާކަމަށާއި، އުތުރާއި ހުވަދުއަތޮޅުގައި އަލަށް ގާއިމްކުރި އައިސްޕްލާންޓްތަކާއި އެ ސަރަހައްދުގައި މަސްވެރިކަން ކުރާ ފާރަތްތަކަށް ލުއިފަސޭހަތަކެއް ލިބޭނެކަން ފާހަގަކުރައްވާ ވަޒީރު ވިދާޅުވީ މިހާރުވެސް 9 އައިސްޕްލާންޓެއް ގާއިމްކުރުމުގެ އަމަލީ މަސައްކަތް ކުރިއަށްދާކަމަށެވެ.
އައިސްޕްލާންޓެއް ގާއިމްކުރުމުގެ އަމަލީ މަސައްކަތް ކުރިއަށްދާ ރަށްތަކަށް ބަލާލާއިރު، ލ. މާބައިދޫ، ލ. މާވަށް، ލ. ހިތަދޫ، މ.ވޭވަށް، ޅ. ނައިފަރު، ށ. ކޮމަންޑޫ، މ. މުލައް، ކުޅުދުއްފުށި ސިޓީ އަދި ދ. ހުޅުދެލި ހިމެނެއެވެ.
މީގެ އިތުރުން ސައުދީ ފަންޑުން ކުރިއަށް ގެންދިޔުމަށް ނިންމާފައިވާ މަޝްރޫއުތަކަށް އަލިއަޅުވާލައްވާ ވަޒީރު ވިދާޅުވީ 5 އައިސްޕްލާންޓެއްގެ މަސައްކަތް ސައުދީ ފަންޑުން ކުރިއަށް ގެންދިޔުމަށް ހަމަޖައްސާފައިވާކަމަށެވެ.
އެގޮތުން ސައުދީ ފަންޑުން ކުރިއަށްގެންދާ މަޝްރޫއުތަކަށް ބަލާލާއިރު، ގދ. ރަތަފަންދޫ، އއ. ރަސްދޫ، ހއ. ދިއްދޫ، ގއ. ދާންދޫ، ކ. ގާފަރުގެ އައިސްޕްލޭންޓުތައް ހިމެނެއެވެ. އަދި ސަރުކާރު ބަޖެޓުން ކުރިއަށްގެންދާ އިތުރު މަޝްރޫއުތަކަށް ބާލާއިރު، ގއ. ނިލަންދޫ، ގއ. ވިލިނގިލި، އަދި ގއ. މާމެންދޫގެ އައިސްޕްލޭޓުތައް ހިމެނެއެވެ.
ވަޒިރު ވިދާޅުވީ އެ އައިސް ޕްލާންޓްތަކުގެ މަސައްކަތް މިއަހަރު ފަށާ ނިންމުމާއި، 23 އައިސްޕްލާންޓެއްގެ މަސައްކަތް ނިންމާ މިއަހަރު އޮޕަރޭޝަނަށް ގެނައުންކަމަކީ އަމާޒެއްކަމަށެވެ. އެއާއެކު ރާއްޖޭގެ މޫސުމީ މަސްވެރިކަމުގައި އައިސްއަށް ޖެހޭ ޖެހުން އެއްކޮށް ނިމުމަކަށް ގެނެވޭނެކަމަށް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ އައިސް ޕްލާންޓްތަކުގެ އިތުރުން ކޯލްޑް ސްޓޯރޭޖްތައް ގާއިމްކުރުމުގެ މަސައްކަތްވެސް ސަރުކާރުން އަންނަނީ ކުރަމުން ކަމަށާއި، ރާއްޖޭގައި މިހާރު ކޯލްޑް ސްޓޯރޭޖްގެ ކެޕޭސިޓީއަކީ 9500 މެޓްރިކް ޓަނުގައި ކަމަށެވެ. އަދި އެއަދަދު 25000 ޓަނަށް އިތުރުކުރުމަކީ ސަރުކާރުގެ އަމާޒެކެއް ކަން ފާހަގަކުރައްވާ އެކަން ކުރުމަށްޓަކައި މިހާރުވެސް 4 ރަށެއްގައި ކޯލްޑް ސްޓޯރޭޖް ގާއިމްކުރުމުގެ މަސައްކަތް ދަނީ ކުރަމުން ކަމަށް ވިދާޅުވިއެވެ.
އެގޮތުން ކޫއްޑޫއާއި ފެލިވަރުގައި 4000 ޓަނަށް ކެޕޭސިޓީ އިތުރުކުރުމުގެ މަސައްކަތް ކުރަމުން އަންނައިރު ގދ. ތިނަދޫގައި 1000 ޓަނުގެ ކެޕޭސިޓީ އިތުރުކުރުމާއި މުލަކުގައި 500 ޓަނަށް ކެޕޭސިޓީ އިތުރުކުރުމުގެ މަސައްކަތް އަންނަނީ ކުރަމުންނެވެ. މީގެ އިތުރުން ސ. ހުޅުމީދޫގައި ކެޕޭސިޓީ 500 ޓަނަށް އިތުރުކުރުމަށް ނިންމާފައިވާއިރު ތ. ހިރިލަންދޫގައި 200 ޓަނުގެ ކޯލްޑް ސްޓޯރޭޖްއެއް ގާއިމްކުރުމަށްވެސް ވަނީ ނިންމާފައެވެ. ހއ. އިހަވަންދޫގައި ކޯލްޑް ސްޓިރެޖް ގާއިމްކުރުމަށް ކުރަންޖެހޭ މަސައްކަތްތަަކާއި ކަނޑުއޮއްގިރީގައިވެސް ކޯލްޑް ސްޓޯރޭޖް 200 ޓަނަށް އިތުރުުކުރުމުގެ މަސައްކަތްވެސް ހިމެނެއެވެ.