'އަލް އަބްރާރު ޕްރައިވެޓް ލިމިޓެޑް' ގުރޫޕުގެ އިހުމާލުން އުމްރާއަށް ނުދެވުނު 28 މީހަކަށް މޯލްޑިވްސް ހައްޖު ކޯޕަރޭޝަނުން އެހީތެރިކަން ފޯރުކޮށްދީ، އެ މީހުން އުމްރާއަށް ފުރުވާލައިފިއެވެ.
ހައްޖު ކޯޕަރޭޝަންގެ މެނޭޖިންގ ޑައިރެކްޓަރު މުހައްމަދު ޝަކީލް 'އެކްސް' ގައި ކުރެއްވި ޕޯސްޓެއްގައި ވިދާޅުވީ، މި އަހަރުގެ ބަރަކާތްތެރި ރަމަޟާން މަހު ޢުމްރާގެ އަޅުކަމަށް ގެންދާނެ ކަމަށް ބުނެ އަމިއްލަ އުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު ޢުމްރާގެ އިންތިޒާމުތައް ހަމަޖައްސާފައި ނުވާތީ އިއްޔެ ހަވީރުގެ ވަގުތެއްގައި މީގެ ތެރެއިން ގިނަ ބައެއްގެ ޝަކުވާ އެކޯޕަރޭޝަނަށް ލިބުނު ކަމަށެވެ. އެމީހުންގެ އެދުމުގެމަތިން މޯލްޑިވްސް ޙައްޖު ކޯޕަރޭޝަނުން ޖާގަ އޮތް މިންވަރުން 28 މީހުންނަށް ވިސާ ޖަހައި މައްކާ އަދި މަދީނާއިން އެކޮމޮޑޭޝަނާ ކެއިންބުއިމާއި ދަތުރުފަތުރުގެ ހުރިހާ އިންތިޒާމުތައް ހަމޖެއްސެވި ކަމަށެވެ.
އަދި މިއަދު ހެނދުނު މޯލްޑިވިއަންގެ ފްލައިޓަކުން އެ 28 މީހުން ސައުދީޢަރަބިއްޔާއަށް ޢުމްރާގެ އަޅުކަމަށް ފުރާފައިވާ ކަމަށް ޝަކީލް ވިދާޅުވިއެވެ.
އަލް އަބްރާރު ގުރޫޕުން ރަމަޟާން މަހުގެ ފަހު 15 އެއްގައި އުމްރާއަށް ދިއުމަށް 110 މީހުން ފައިސާ ދައްކާފައިވެއެވެ. ނަމަވެސް، ފުރަން އޮތް ދުވަހު ކުއްލި ބައްދަލުވުމެއް ބާއްވައި، ސަރަހައްދީ މަޝްރަހު އޮތް ގޮތުން ރިސްކެއް ނަގަން ބޭނުން ނުވާ ކަމަށް ބުނެ އެ ގުރޫޕުން ވަނީ ދަތުރު ކެންސަލްކޮށްފައެވެ.
ވީ ނިއުސް އަށް މައުލޫމާތު ލިބުނު ގޮތުގައި އަލް އަބްރާރު ގުރޫޕުން 110 މީހުން އުމްރާއަށް ފުރަން ހަމަޖެހިފައި އޮތީ ރޭގައެވެ. އެ ދަތުރަށް ކޮންމެ މީހަކު ގާތްގަނޑަކަށް 45،000 ރުފިޔާ ދައްކައިފައިވަނިކޮށް، ފުރުން ކުއްލިއަކަށް ވަނީ، ކެންސަލްކޮށްފައެވެ. މައުލޫމަތު ލިބިފައިވާ ގޮތުގައި މި މައްސަލަ މިހާރު ވަނީ ފުލުހަށް ވެސް ހުޅުވާފައެވެ.