ސްޓެލްކޯގެ ސަބްސްޓޭޝަން އިމާރާތްތަކުގެ ފާރުތަކާއި، ޑިސްޓްރިބިއުޝަން ފޮށިތަކުގައި ޕޯސްޓަރާއި ސްޓިކާ ހަރުނުކުރުމަށް އެކުންފުނިން އެދިއްޖެއެވެ.
ދައުލަތުގެ މީޑިއާއަށް މައުލޫމާތުދެމުން ސްޓެލްކޯއިން ބުނީ، އެކުންފުނިން ހިދުމަތްދޭ އިމާރާތްތަކާއި، ސަބްސްޓޭޝަން އިމާރާތްތަކުގެ ފާރުތަކުގެ ބޭރުގައި އަދި ޑިސްޓްރިބިއުޝަން ފޮށިތަކުގެ ބޭރުގައި އެކި ފަރާތްތަކުން ޕޯސްޓަރާއި، ސްޓިކާ ފަދަ ތަކެތި ތަތްކުރަމުންދާކަން ފާހަގަކުރެވިފައިވާކަމަށެވެ.
މީގެ އިތުރުން ސްޓެލްކޯއިން ވަނީ، ސަބްސްޓޭޝަން އިމާރާތްތަކުގެ ބޭރުގައި ހަރުކޮށްފައިވާ އިންޒާރު ނުވަތަ ނުރައްކާ ބޯޑުތަކުގެ މަތީގައި ސްޓިކާ އަދި ޕޯސްޓަރު ތަތްކުރުމުގެ ސަބަބުން ރައްކާތެރިކަމާއެކު ދެމެހެއްޓެނެވި ގޮތެއްގައި ކަރަންޓުގެ ހިދުމަތް ދިނުމަށް ސްޓެލްކޯއިން ކުރަމުންދާ މަސައްކަތްތަކަށް ހުރަސް އެޅެމުންދާކަންވެސް ފާހަގަކޮށްފައެވެ.
އެހެންކަމުން އެ ކުންފުނިން ވަނީ، ހިދުމަތްދޭ އިމާރާތްތަކާއި، ސަބްސްޓޭޝަންތަކުގެ އިމާރާތުގެ ފާރުތަކުގެ ބޭރުގައި އަދި ޑިސްޓްރިބިއުޝަން ފޮށިތަކުގެ ބޭރުގައި ޕޯސްޓަރ، ސްޓިކަރ އަދި މިނޫނަސް އެއްވެސް އެއްޗެއް ތަތްނުކުރުމަށް އެދިފައެވެ.