ފަތުރުވެރިކަން އިޝްތިހާރު ކުރަން ދުނިޔޭގައި ބާއްވާ އެންމެ ބޮޑު އެއް ފެއާ، އައިޓީބީ ބާލިން 2026ގައި ވިޒިޓް މޯލްޑިވްސް ކޯޕަރޭޝަން (ވީއެމްސީން) ބައިވެރިވެ ރާއްޖެ އިޝްތިހާރު ކުރަން ފަށައިފިއެވެ.
ވީއެމްސިއިން ބުނީ، މިއަދު ފެށި އައިޓީބީ ފެއާގައި ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 67 ކުންފުންޏަކުން ޖުމްލަ 159 މީހުން ބައިވެރިވެފައިވާ ކަމަށެވެ.
މިއަހަރުގެ ފެއަރގައި ރާއްޖެއިން ވަނީ 504 އަކަމީޓަރުގެ ބޮޑު ސްޓޭންޑެއް ތައްޔާރުކޮށްފައިވާއިރު، މިއީ އައިޓީބީ ބާލިންގައި ރާއްޖެއިން މިހާތަނަށް ބައިވެރިވި ހުރިހާ ފަހަރަކާ އަޅާބަލާއިރު ތައްޔާރުކުރި އެންމެ ބޮޑު ސްޓޭންޑެވެ. ހަތަރު ފަރާތުން ވަދެވޭ ގޮތަށް ފަރުމާކޮށްފައިވާ މި ޑަބަލް ޑެކް ސްޓޭންޑް ތައްޔާރުކޮށްފައިވަނީ ސަފާރީއެއްގެ ސިފަ ޖެހޭ ގޮތަށެވެ. މި ސްޓޭންޑަށް ޒިޔާރަތްކުރާ ފަރާތްތަކަށް ރާއްޖޭގެ ކަނޑުމަތީގެ ދަތުރުފަތުރުގެ ތަޖުރިބާ ކޮށްލުމުގެ ފުރުސަތު ލިބިގެންދާނެ ކަމަށް ވީއެމްސީން ބުނެއެވެ.
މިއަހަރުގެ ފެއަރގެ ހަވާސާގައި ތަފާތު އެކި ހަރަކާތްތައް ކުރިއަށްގެންދިއުމަށް ރޭވިފައިވާ ކަމަށް ވީއެމްސީއިން ބުނެއެވެ. އެގޮތުން ނޫސްވެރިންގެ ބައްދަލުވުމެއް ބޭއްވުމަށް ހަމަޖެހިފައިވާއިރު، މި ބައްދަލުވުމުގައި ރާއްޖޭގެ ފަތުރުވެރިކަމާ ގުޅޭ މުހިންމު ކަންތައްތަކެއް އިޝްތިހާރުކުރާނެ ކަމަށް ވެސް ވީއެމްސީން ވަނީ ބުނެފައެވެ. މީގެ އިތުރުން، މާދަމާ ރޭ 'މޯލްޑިވިއަން ނައިޓް' ގެ ނަމުގައި ހާއްސަ ހަރަކާތެއް ރިޓްސް ކާރލްޓަން ބާލިންގައި ބޭއްވުމަށް ހަމަޖެހިފައިވާ ކަމަށް ވެސް ވީއެމްސީ އިން ވަނީ ބުނެފައެވެ.
އެގޮތުން މިއަހަރުގެ "މޯލްޑިވިއަން ނައިޓް" ބޭއްވުމަށް ހަމަޖެހިފައިވަނީ، ބޭންކް އޮފް މޯލްޑިވްސް އާއި ގުޅިގެން ކަމަށް ވީއެމްސީއިންވަނީ ބުނެފައެވެ. އެހެން ކަމުން މި ހަފުލާގައި، ދުނިޔޭގެ މަޝްހޫރު ޓުއަރ އޮޕަރޭޓަރުންނާއި، އެއާލައިންތަކާއި، ނޫސްވެރިންނާއި، ފަތުރުވެރިކަމުގެ ދާއިރާގެ އިސްވެރިން ބައިވެރިވާނެ ކަމަށާއި، މިއީ ދިވެހިންގެ މެހެމާންދާރީއާއި، ސަގާފަތާއި، އަދި ފަތުރުވެރިކަމުގެ ސިނާއަތުގައި ރާއްޖެ ހޯދާފައިވާ އާ އީޖާދުތައް ފާހަގަކުރުމަށް ބާއްވާ ހާއްސަ ހަފުލާއެއް ކަމަށް ވެސް ވީއެމްސީ އިން ބުނެއެވެ.
ބީއެމްއެލްއާ އެކު ބާއްވާ މި މޯލްޑިވިއަން ނައިޓްގައި، ފައިސާގެ މުއާމަލާތްތައް ފަސޭހަކުރުމަށް ތައާރަފުކުރާ ޑިޖިޓަލް ޕޭމަންޓް ސޮލިއުޝަން "ބީއެމްއެލް ސްވައިޕް" އިފްތިތާހުކުރުމަށް ވަނީ ހަމަޖެހިފައެވެ. މިއީ ވިޒިޓް މޯލްޑިވްސް އިޔާ 2027ށް ތައްޔާރުވުމުގެ ގޮތުން، ފަތުރުވެރިންނަށް ލުއިފަސޭހަ ތަޖުރިބާތަކެއް ފޯރުކޮށްދިނުމަށާއި ޓެކްނޮލޮޖީގެ ގޮތުން ރާއްޖެ ކުރިއަރަމުންދާކަން ހާމަކޮށްދޭ ކަމެއް ކަމުގައި ވީއެމްސީއިން ބުނެއެވެ.