އިސްރާއީލާއި އެމެރިކާއިން އިރާނުގެ މިނާބުގައި ހުންނަ އަންހެންކުދިން ކިޔަވާ ސްކޫލަކަށް ދިން ހަމަލާގައި މަރުވި 168 ކުޑަކުދިންނާއި 14 ޓީޗަރުންގެ ޖަނާޒާގައި ގިނަ ބަޔަކު ބައިވެރިވެއްޖެއެވެ.
އިސްރާއީލާއި އެމެރިކާއިން އިރާނަށް ހަމަލާދިން ފުރަތަމަ ދުވަސްކަމުގައިވާ ހޮނިހިރު ދުވަހު ދިން ހަމަލާތައް މިސްކޫލަށް އަރާފައިވާއިރު އެހަމަލާގައި މަރުވި މީހުންގެ ޖަނާޒާ ބާއްވާފައިވަނީ މިއަދުއެވެ. އެޖަނާޒާގައި މިނާބުގެ އެކި ހިސާބުތަކުން އެތައް ހާސް ބަޔަކު ވަނީ ބައިވެރިވެފައެވެ. ޖަނާޒާގައި ބައިވެރިވި ބައެއް މީހުން މަރުވި ކުދިންގެ ފޮޓޯތައް ހިފައިގެން ދިޔައިރު މިއީ ފޫނުބެއްދޭނެވަރުގެ ހިތާމައެއްގެ ގޮތުގައި އިރާނުގެ ރައްޔިތުން އަންނަނީ ބުނަމުންނެވެ. އެހަމަލާއާ ދެކޮޅަށް އިރާނުގެ ސަރުކާރާ ދެކޮޅު މީހުންވެސް ވަނީ ވާހަކަދައްކާފައެވެ.
އިރާނުގެ ރައީސް މަސްއޫދު ޕެޒެޝްކިއާ އިއްޔެ ވިދާޅުވީ އެއްވެސް ގައުމެއްގެ ކުޑަކުދިންނަށް މިފަދަ ގޮތެއް ވުމުގައި އެއްވެސް ސަބަބެއް ނޯންނާނެކަމަށެވެ. ކުޑަކުދިންނަށް މިފަދަ ބޮޑު އަނިޔާއެއް މިފަދަ ބޮޑު ބިރުވެރިކަމެއް ކުރިމަތިވެގެން ނުވާނެކަމަށް ޕެޒެޝްކިޔާ ވިދާޅުވިއެވެ. އަދި އެމެރިކާ އާއި އިސްރާއީލުން އިރާނަށް ދެމުންދާ ހަމަލާތަކަކީ ހަމައެކަނި އަސްކަރީ ތަންތަނަށް އަމާޒުކޮށް ދޭ ހަމަލާތަކެއް ނޫންކަމަށާއި މިއީ އިރާނުގެ ރައްޔިތުންނާ ދެކޮޅަށް ދެމުންދާ ހަމަލާތަކެއްކަމަށް ޕެޒެޝްކިޔާ ވިދާޅުވިއެވެ.
މީގެއިތުރުން އިރާނުގެ ފޮރިން މިނިސްޓަރ އައްބާސް އަރަގްޗީ ވަނީ މިކުދިން ވަޅުލުމަށް ކޮންނަމުންދާ ކަށްވަޅުތަކާއެކު ނަގާފައިވާއި ފޮޓޯއެއް ޕޯސްޓެއްކުރައްވާ މިއީ އެމެރިކާ އާއި އިސްރާއީލުން ދިން ހަމަލާގައި މަރުވެގެންދިޔަ 160ށް ވުރެ ގިނަ މައުސޫމް ކުޑަކުދިންގެ ހަށިތައް ވަޅުލުމަށް ކޮންނަމުންދާ ކަށްވަޅުތައް ކަމަށާއި އެކުދިންގެ ހަށިތައް ވަނީ ކުދިކުދިވެފައިކަމަށް ވިދާޅުވެފައެވެ.
އަންގާރަ ދުވަހު އދ ގެ ހިޔުމަން ރައިޓްސް ގެ ޗީފް ވޮލްކަރ ޓާރކް ވަނީ މިކަން ހިނގާދިޔަ ގޮތުގެ ފުރިހަމަ ތަހުގީގެއް ވީ އެންމެ އަވަހަކަށްކުރުމަށް ގޮވާލައްވާފައެވެ. އަދި ސްކޫލެއް އެހެން ތަނެއް ބެލުމެއްނެތި މިގޮތަށް ދޭ ހަމަލާތަކަކީ ބައިނަލްއަގްވާމީ ގާނޫނުތަކާ ޚިލާފަށް ދޭ ހަމަލާތަކެއްކަމަށް ވަނީ ވިދާޅުވެފައެވެ.