މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ލޯގޯ ބޭނުން ކުރަން ފަށައިފިއެވެ.
އެ ކޮމިޝަނުގެ އައު ލޯގޯ ބޭނުން ކުރަން ފަށާފައިވަނީ މާރިޗު މަހުގެ 3 ވަނަ ދުވަހުން ފެށިގެންނެވެ. މި ލޯގޯ ފަރުމާކޮށްފައިވަނީ ކޮމިޝަންގެ މަޤްޞަދުތަކާއި އެއްގޮތަށް ކަމަށް އެމްއެމްބީސީ އިން ވަނީ ބުނެފައެެވެ. ކޮމިޝަނުގެ ލޯގޯ ހަތަރު ބަޔަކަށް ވަނީ ބަހާފައެވެ.
ކޮމިޝަނުގެ ލޯގޯއިން ރަމްޒުކޮށްދޭ ކޮމާކޯޅި ދައްކުވައިދެނީ، ޚިޔާލުފާޅުކުރުމުގެ މިނިވަންކަން ކަމަށާއި، ބްރޯޑްކާސްޓިން ވޭވްސް ދައްކުވައިދެނީ، މައުލޫމާތު ފެތުރިގެންދާ ހަލުވި މިންކަމަށް އެމްއެމްބީސީން ބުނެފައިވެއެވެ. އަދި ލޯގޯ ހަތަރު ބައެއް ރަމްޒުކޮށްދޭއިރު މިކަމުން މީޑިއާ އަކީ ހަތަރުވަނަ ބާރުކަން ދައްކުވައިދޭ ކަމަށް އެ ކޮމިޝަނުން ވަނީ ބުނެފައެވެ.
މީގެ އިތުރުން ކޮމިޝަނުގެ ލޯގޯއިން ރަމްޒުކޮށްދޭ ތާނައިގެ ތިން އަކުރު، "މ"، "ބ" އަދި "ކ" ދައްކުވައިދެނީ، ދިވެހި ބަހާއި ސަޤާފަތަށް ދޭ އަހަމީއްޔަތުކަން ކަމަށް މީޑިއާ ކޮމިޝަނުން ފާހަގަކޮށްފައިވެއެވެ.
އެމްއެމްބީސީން ބުނީ މި އައު ލޯގޯއާއެކު، ކޮމިޝަނުގެ އެންމެ ބޮޑު އަމާޒަކީ ރާއްޖޭގެ މީޑިއާގެ މިނިވަންކަން ދަމަހައްޓައި ޒިންމާދާރު ނޫސްވެރިކަމުގެ ސަޤާފަތެއް ކުރިއެރުވުމަށް ކުރާ މަސައްކަތް އިތުރަށް ހަރުދަނާ ކުރުން ކަމަށެވެ.