ބ.ގޮއިދޫ ދަނޑުތަކުގައި ޕެސްޓިސައިޑްގެ ހާލަތު އޮތް މިންވަރު ދެނެގަތުމުގެ މަސައްކަތް ފަށާފައިވާކަމަށް ދަނޑުވެރިކަމާ ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.
ބ.ގޮއިދޫގައި ކެންސަރު ބަލިޖެހޭ މީހުންގެ އަދަދު އިތުރުވެ، އެރަށު ދަނޑުތަކުގައި ޕެސްޓިސައިޑް ބޭނުންކުރާ މިންވަރު ބެލުމަށް އިންސްޕެކްޝަނެއް ހިންގައިދިނުމަށް ގޮއިދޫ ރައްޔިތަކު ވަނީ އެކަން ސަރުކާރުގެ ކަމާ ބެހޭ އިދާރާއަށް ހުށަހަޅާފައެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި މިކަމާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބުދެއްވަމުން ވަޒީރު މާރިއާ ވިދާޅުވީ، މޯލްޑިވްސް ފުޑް އެންޑް ޑްރަގް އޮތޯރިޓީން އެކަމާ ގުޅޭގޮތުން ކުރަންޖެހޭ ޓެސްތްތަކާއި ރީސާޗްތައް ހެދުމުގެ މަސައްކަތް މިހާރު ކުރިއަށްދާކަމަށެވެ.
ވަޒީރު ވިދާޅުވީ އެކަމުގައި ސަރުކާރުގެ ފަރާތުން އެމްއެފްޑީއޭއަށް ދޭންޖެހޭ އެއްބާރުލުން ދެމުންދާކަމަށާއި، އުއްމީދަކީ އެކަމުގައި އަވަސް ހައްލެއް ލިބިގެންދިއުންކަމަށެވެ. އަދި ޕެސްޓިސައިޑް ގާނޫނެއް އޮތްނަމަވެސް އެކަމާ ގުޅޭގޮތުން އަދި އެއްވެސް ޕޮލިސީއެއް ހެދިފައިނުވާކަމަށް ވެސް ވަޒީރު ވިދާޅުވިއެވެ.
ގޮއިދޫގައި ކެންސަރު ޖެހޭ މީހުންގެ އަދަދު އިތުރުވަމުންދާތީ މިދިޔަ އަހަރުގެ ޑިސެމްބަރުމަހު އެރަށު ރައްޔިތެއްކަމަށްވާ ޝަހުލާ ވަޖީހު ނަމަކަށް ކިޔާ މީހަކު ވަނީ ދަނޑުވެރިކަމާބެހޭ މިނިސްޓްރީ އަށާއި، ހެލްތް މިނިސްޓްރީއަށް ސިޓީއެއް ފޮނުވާފައެވެ. މި ސިޓީގައި އޭނާ ބުނެފައިވަނީ މިދިޔަ ފަސް އަހަރެއްހާ ދުވަހުގެ ތެރޭގައި ކެންސަރުޖެހިގެން ގޮއިދޫއިން 5 މީހަކު ނިޔާވެފައިވާކަމަށާއި، އެހެންކަމުން ކެންސަރު ބައްޔާއި އެރަށު ދަނޑުތަކުގައި ޕެސްޓިސައިޑް ބޭނުންކޮށްގެން ދަނޑުވެރިކަން ކުރުމާ އެއްވެސް ގުޅުމެއް ވޭތޯ ބަލައިދިނުމަށް އެދޭކަމަށެވެ.
މީގެ އިތުރުން އޭނާ ބުނީ، ގާތްގަނޑަކަށް 500 މީހުން އުޅޭ ގޮއިދޫގައި ގައިން ގަޔަށް ނާރާ ބަލިތައް ވަރަށް ބޮޑަށް އިތުރުވަމުންދާ ކަމަށެވެ.