މ. ރަތްމަންދޫ މީހުންނަށް ކ. ތުލުސްދޫއިން ބިން ދޫކުރަން ހަމަޖައްސައިފި އެވެ.
ހައުސިން މިނިސްޓްރީން ބުނީ ރަތްމަންދޫ މީހުން ތުލުސްދުއަށް ބަދަލުކުރުމުގެ މަސައްކަތް ކުރިއަށް ގެންދިއުމަށް އެ ރަށުން 44 ގޯތި ހަމަޖައްސާފައިވާ ކަން ތުލުސްދޫ ކައުންސިލުން އެ މިނިސްޓްރީއަށް އަންގާފައިވާ ކަމަށެވެ.
އެ މަޝްރޫޢު ކުރިއަށް ގެންދިއުމަށްޓަކައި ކުރަންޖެހޭ މަސައްކަތްތައް މިނިސްޓްރީން މިހާރު ފަށާފައިވާކަން، ރަތްމަންދޫ ކައުންސިލަށް އަންގާފައި ވާކަމަށް ވެސް އެ މިނިސްޓްރީން ވަނީ ބުނެފައެވެ.
އާބާދީގައި 300 އެއްހާ މީހުން ދިރިއުޅޭ ރަތްމަންދޫގެ މީހުން އެހެން ރަށަކަށް ބަދަލުވުމާ މެދު ރަށުގެ މީހުންގެ މެދުގައި މިދިޔަ އަހަރު ވަނީ ހިޔާލު ތަފާތުވުންތައް އުފެދިފަ އެވެ. ރައީސް ޑރ. މުހައްމަދު މުއިއްޒު މިދިޔަ އަހަރުގެ ސެޕްޓެމްބަރު މަހު އެ ރަށަށް ކުރެއްވި ދަތުރުފުޅުގައި ވަނީ އެ މައްސަލައިގައި ރަށުގެ ރައްޔިތުންގެ ހުރި ހިޔާލުތައް އަޑުއައްސަވައިފަ އެވެ.
އެ ރަށުން އެހެން ރަށަކަށް ހިޖުކުރަން ބޭނުންވާ މީހުން ސޮއިކޮށް ރައީސަށް ޕެޓިޝަނެއް ވެސް ހުށަހަޅާފައިވެ އެވެ.
ރައީސް އޭރު ވިދާޅުވީ އެ މައްސަލައަށް ދާއިމީ ހައްލެއް ހޯއްދަވައިދެއްވަން ބޭނުންވާ ކަމަށާއި، ރައްޔިތުން ބޭނުންވަނީ އެހެން ރަށަކަށް ހިޖުރަކުރަން ކަމަށްވާނަމަ ހައުސިން މަޝްރޫއެއް ފެށޭތޯ ބައްލަވައިދެއްވާނެ ކަމަށެވެ. އެއާއެކު އެ މަނިކުފާނު ވަނީ، ރަށުގެ އާބާދީގެ 80 އިންސައްތަ ބަދަލުވާން ބޭނުންވާކަން އަންގައިދިނުމަށް އެދިވަޑައިގެންފައެވެ.