މެދުއިރުމަތީގައި ހިނގަމުންދާ ހަނގުރާމައާ ގުޅިގެން ރާއްޖެއަށް ބޭނުންވާ ކާބޯތަކެއްޗާއި ތެލާއި ގޭސް މެދުކެނޑުމެއް ނެތި ލިބޭނެކަމުގެ ޔަގީންކަން އިކޮނޮމިކް މިނިސްޓަރު މުހައްމަދު ސައީދު މިއަދު ދެއްވައިފި އެވެ.
މިނިސްޓަރު ސައީދު މިހެން ވިދާޅުވީ ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
"އިއްޔެ ރައީސް ފާހަގަކުރެއްވި ގޮތަށް އަޅުގަނޑުމެންނަށް އަދި އެއްވެސް ކަންބޮޑުވުމެއް ނެތް ކުރުކޮށް ދަންނަވާ ނަމަ ތެލަކަށް ނުޖެހޭނެ، އިރާދަކުރެއްވިއްޔާ. އެލްޕީޖީ ވެސް އަދި ތެޔޮ ވެސް ހިމަނައިގެން މި ދެންނެވީ." އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވިއެވެ.
މިނިސްޓަރު ސައީދު ވިދާޅުވީ ބައިނަލްއަގުވާމީ މާކެޓުތަކުގައި އިއްޔެ ތެލުގެ އަގު %25-%30އަށް އުފުލުނު ކަމަށާއި މިހާރުގެ ހާލަތު އޮތް ގޮތުން ތަކެތީގެ އަގަށް ބަދަލު އަންނަމުންދާ ކަމަށާއި ރާއްޖެއިން ފިޔަވަޅުތައް އަޅަނީ އެކަންތަކަށް ވިސްނައިގެންކަމަށެވެ.
އަދި ހަނގުރާމައިގެ ސަބަބުން ތެލާއި ގޭސް އުފެއްދުމަށް ހުރަސްތަކެއް ކުރިމަތިވެފައިވާއިރު، އެހެން މާކެޓުތަކުން ތެލާއި ގޭހާއި ކާބޯތަކެތި ގެނެވޭނެ އެހެން މަގުތައް ބަލަމުން އަންނަ ކަމަށް މިނިސްޓަރު ވިދާޅުވިއެވެ.
އެހެންކަމުން ރާއްޖެއިން ތެލަށް ނުޖެހޭނެ ކަމަށް މިނިސްޓަރު ވަނީ ވިދާޅުވެފައެވެ.
ކާބޯތަކެތީގެ އަގުތައް އުފުލުމުގެ ފުރުސަތު ބޮޑު ނަމަވެސް ސަރުކާރުން މަސައްކަތް ކުރަނީ އެކަމުގެ އަސަރު ރައްޔިތުންނަށް އެންމެ ކުޑަވާނެ ގޮތްތަކަށް ވިސްނައިގެން ކަމަށްވެސް މިނިސްޓަރު ސައީދު ވަނީ ވިދާޅުވެފައެވެ.
ހަމައެހެންމެ ރާއްޖެއަށް އަންނަ ޓޫރިސްޓުންނާއި ވަޒީފާ އަދާކުރާ ބިދޭސީން ހިމަނައިގެން ރާއްޖޭގެ ޖުމްލަ އާބާދީއަށް ބޭނުންވާ އަސާސީ ކާބޯތަކެތީގެ ރައްކާތެރިކަން ކަށަވަރުކުރުމުގެ ގޮތުން ރާއްޖޭގައި މުދާ ރައްކާކުރެވޭނެ ކެޕޭސިޓީ އިތުރުކުރަން ވެސް ސަރުކާރުން މަސައްކަތްތަކެއް ކުރަމުންދާ ކަމަށް މިނިސްޓަރު ސައީދު ވަނީ ވިދާޅުވެފައެވެ.
މީގެ އިތުރުން މެދުއިރުމަތީގެ ހަމަނުޖެހުންތައް އުފެދެމުން ދާlical އިރުވެސް ދުރާލާ އެކަންކަމަށް ރާއްޖޭން ތައްޔާރުވެފައިވާކަން ފާހަގަކުރައްވާ މިނިސްޓަރު ވިދާޅުވީ މިހާރުވެސް ރާއްޖެއަށް ތެޔޮ ޝިޕްމަންޓެއް އަންނަމުންދާ ކަމަށެވެ.