ހަރަދުކުޑަކުރަން ކަމަށްބުނެ ދެ އިންތިހާބު އެއްކޮށްލައިގެން ގާނޫނުއަސާސީއަށް ގެންނަން އުޅެނީ "ބޮޑު ބަޣާވާތެއް" ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހް މިހެން ވިދާޅުވީ އެމްޑީޕީ ހަރުގޭގައި ބޭއްވި ޖަލްސާގައި ވާހަކަ ދައްކަވަމުންނެވެ.
ޤާނޫނުއަސާސީއަށް އިސްލާހު ގެނައުމުގައި މިހާރު އަމަލުކުރަމުންދާ ގޮތާ މެދު ކަންބޮޑުވުން ފާޅުކުރައްވަމުން ރައީސް ޞާލިހު ވިދާޅުވީ މިއަދު ސަރުކާރުން ކުރަން އުޅޭ ކަމަކީ ރައްޔިތުންގެ އަޑު ކަނޑުވާލައި، ރައްޔިތުންގެ ބާރު ކަނޑުވާލުން ކަމަށެވެ.
"އާދެ މިރޭ އަޅުގަނޑުމެންނަށް ވާހަކަދައްކަންޖެހިފައި މިއޮތީ ކުރިއަށްއޮތް ލޯކަލް ކައުންސިލްގެ އިންތިހާބުގެ ކެމްޕޭނާ ބެހޭ ގޮތަކުންނެއް ނޫން. އެ އިންތިޚާބާއި އެކީގަ ސިއްރިއްޔާތުގައި ސިއްރު ސިއްރުން މި ސަރުކާރުން ކުރަން އުޅޭ ބޮޑު ބަޣާވާތެއްގެ ވާހަކަ. ޤާނޫނު އަސާސީއަށް ގެންނަ ބޮޑު ބަޣާވާތެއްގެ ވާހަކަ.އެހެންނޫންނަމަކަ މި އިންތިހާބުގެ ފަހަތުގައި ސިއްރުން މި ވޯޓާއި ހިސާބަށް ގެންދާކަށް ނުޖެހޭނެ. މިއަދު ކުރަން މިއުޅޭ ކަމަކީ ރައްޔިތުންގެ އަޑު ކަނޑުވާލާ ރައްޔިތުންގެ ބާރު ކަނޑުވާލާ ބާރުތައް އެއްކޮށް ހުދުމުހުތާރު ވެރިކަމަކާ ދިމާލަށް މި ގައުމު ކުރިއަށްގެންދަން ކުރާ މަސައްކަތް. އަޅުގަނޑުމެން އެމްޑީޕީން މިކަމަށް ނޫނެކޭ ބުނަންމިތިބީ ނިންމައިގެން" ރައީސް ޞާލިހް ވިދާޅުވިއެވެ.
މީގެ 18 އަހަރު ކުރިން އެ ގާނޫނުއަސާސީ ވުޖޫދަށް ގެނެސްފައި ވަނީ ވަރަށް ހާމަކަން ބޮޑު ގޮތެއްގައި ކުރި މަސައްކަތުން ކަމަށް ވިދާޅުވެ ދެ އިންތިހާބު އެއްކޮށް ބޭއްވުމަށް ގާނޫނުއަސާސީ އިސްލާހުކުރުމުގެ ޕްރޮސެސް މި ސަރުކާރުން ކުރިއަށް ގެންދާ ގޮތާ މެދު ރައީސް ޞާލިހް ވަނީ ސުވާލު އުފައްދަވާފައެެވެ.
ރައްޔިތުންގެ މަޖިލީހުގައި 15 މިނެޓެއްހާއިރު އެކަމަށް ބަހުސްކޮށްފައި ކޮމިޓީން އަނބުރާ ފޮނުވުމުން ފާސްކުރީ ކަމަށާއި ރައްޔިތުންގެ މަޖިލީހުން ފާސްކުރުމަށް ފަހު، ތަސްދީގު ކުރުމުގެ ކުރިން ރައްޔިތުންނާ ހިސާބަށް ދާންޖެހޭ އިސްލާހުތައް ވެސް ހުންނަ ކަމަށް ރައީސް ޞާލިހް ވިދާޅުވިއެވެ.
ނަމަވެސް މި ސަރުކާރުން ކަންކަން ކުރަން އުޅެނީ "ސިއްރު ސިއްރުން" ކަންކަމަށް ރައީސް ޞާލިހް ވިދާޅުވިއެވެ. ެަރައީސް ޞާލިހް ވިދާޅުވީ ގާނޫނުއަސާސީއަށް އިސްލާހު ގެންނަ ނަމަ، އެ އިސްލާހުތަކާ ގުޅިގެން ރައްޔިތުން ދެކޭ ގޮތް ހޯދޭނެ ގޮތްތަކެއް ލިޔެފައި އޮންނަންޖެހޭ ކަމަށާއި އެކަމަށް ބަހުސްކޮށް އެ ދާއިރާގެ މީހުންގެ މަޝްވަރާ ހޯދަން ޖެހޭ ކަމަށެވެ.
ނަމަވެސް މިހާރު ރައްޔިތުން ތިބީ ވާނުވާއެއްގައި ކަމަށާއި ސަރުކާރުން ބުނަމުން ދަނީ މިއީ އިންތިހާބު ބާއްވަން ހަރަދުވާ 50 މިލިއަން ރުފިޔާގެ ގެއްލުން ކުޑަކުރަން ކުރާ ކަމެއް ކަަމަށް ރައީސް ޞާލިހް ވިދާޅުވިއެވެ.